Дьокуускайга 37 саастаах эр киһи быһаҕынан анньыллыбыт

Ааспыт сууккаҕа Саха сиригэр 7 буруйу оҥоруу тахсыбыта бэлиэтэммит. Бу туһунан СӨ Борокуратууратын пресс-сулууспата суруйар.

Дьокуускайга 37 саастаах эр киһи быһаҕынан анньыллан балыыһаҕа киирбит. Буруйданааччы дьахтар тутуллубут.

Киин куоракка  Дзержинскай аатынан уулуссаҕа турар дьиэ аттыгар 48 саастаах эр киһи өлүгэ булуллубут. Борокуратуура иһитиннэриитинэн, эр киһи дьиэ иккис этээһин балконуттан сууллубут.

Түөкүннээһин түөрт түбэлтэтин туһунан сайабылыанньалар киирбиттэр: Дьокуускай куорат, Нам уонна Таатта оройуоннарын олохтоохторо уопсайа 2,4 мөл. солк. кэриҥэ суума харчыларын уордарбыттар. Түөкүттэр  ФСБ, Энергосбыт, мобильнай сибээс үлэһиттэрэ уонна ОДьКХ оператора буолан кубулунан эрийэн тахсыбыттар.

Нам оройуонугар наркотигы сокуоннайа суох эргинии түбэлтэтэ тохтотуллубут. Киһи өлүүлээх суол быһылаана регистрацияламматах. Сууккаҕа 10 итирик туруктаах уруулга олорбут суоппар тутуллубут.