Дьокуускайга 4 сулустаах гостиница тутуллуо

Арассыыйа бырабыыталыстыбатын бэрэссэдээтэлэ  “Якутия” урутаан сайдар сир (ТОР) кыраныыссатын кэҥэтэр туһунан уураахха илии баттаата. Бу чэрчитинэн, ТОР резиденэ – “Центр” СДК  хампаанньа 4 сулустаах, 150 нүөмэрдээх, аныгы ирдэбиллэргэ эппиэттиир гостиницаны тутары былаанныыр.

Бу инвестор “Якутия” урутаан сайдар сири кытары үлэлэһэр кэмигэр, Уһук Илини, Арктиканы сайыннарыы корпорациятын кытары сөбүлэһии чэрчитинэн, барыта 1,4 миллиард солкуобайы хамсатар, 73 үлэ миэстэтин таһаарар былааннаах.

— «Центр» хампаанньа бырайыагын кэлим арыаллааһыҥҥа киирдибит, “Якутия” ТОР кыраныыссатын кэҥэттибит, инвестор биисинэскэ көҕүлээһинигэр көмөлөстүбүт. “Якутия” резиденин статуһун ылан баран, бырайыак судаарыстыба көмөтүнэн – нолуокка чэпчэтиилэринэн, о.д.а. туһанар. Бу бырайыак олоххо киирдэҕинэ, эрэгийиэҥҥэ саҥа инвестордар кэлиэхтэрэ, ону тэҥэ, киин куоракка ыалдьыттары көрсүү саҥа таһымҥа тахсыаҕа, — диэн Саха сирин сайыннарыы корпорациятын дириэктэрэ Дмитрий Борисов эттэ.