Дьокуускайга 48 саҥа оптуобус маршрутка тахсыаҕа

Чэппиэргэ, тохсунньу 22 күнүгэр, Дьокуускайга 48 VolgaBus мааркалаах оптуобуһу аҕаллылар.

СӨ Ил Дархана Айсен Николаев «Сойуус Авто» тэрилтэ дириэктэригэр Андрей Косицкайга күлүүстэри туттарда. Оптуобустар кэлэр нэдиэлэттэн куорат маршруттарынан пассажирдары таһан саҕалыахтара.

«Бүгүн биһиги куоракка 48 элбэх киһи киирэр кыамталаах VolgaBus оптуобуһу туттарабыт. Бу тимир көлөлөр сырыыга таҕыстахтарына,  маршруттарынан суоппардарга уонна пассажирдарга усулуобуйа икки төгүл тупсуоҕа. Чугастааҕы сылларга өссө 100-тэн тахса маннык оптуобуһу атыылаһар былааннаахпыт. Бу дьон олоҕун хаачыстыбатын дьиҥнээхтик тупсарыаҕа. Арассыыйа бэрэсидьиэнэ бигэргэппит Дьокуускай куорат маастар-былаанын олоххо киллэрии түмүгэр, бары хайысхаларынан, ол иһигэр хас биирдии куорат олохтооҕор суолталаах пассажирдары таһыы уонна оптуобус сырыытын курдук боппуруостарга, көхтөөх үлэ барар», — диэн Саха сирин Ил Дархана Айсен Николаев бэлиэтээтэ.

Ил Дархан өрөспүүбүлүкэ бырабыыталыстыбатыгар, тырааныспар министиэристибэтигэр, Дьокуускай куорат уокуруктааҕы дьаһалтатыгар уонна куорат авто-таһааччыларын сойууһугар федеральнай былаас уорганнарын уонна сайдыы институттарын кытта үлэлээн, оптуобустар киин куоракка кэлбиттэригэр махталын биллэрдэ.

«Дьокуускай түргэнник улаатар-кэҥиир,  оптуобус маршруттара уларыйаллар. Онон уопсастыбаннай тырааныспар систиэмэтин сайыннарыы — биир сүрүн сорук буолар. 2022 сылтан Дьокуускай куорат дьаһалтата уонна СӨ тырааныспарын уонна суол хаһаайыстыбатын министиэристибэтэ 174 оптуобуһу атыыласта. Саҥа оптуобустар 80%-нара учуокка туруорулунна, уонна кинилэр кэлэр нэдиэлэҕэ куорат маршруттарыгар тахсыахтара. Саамай кыһалҕалаах 5, 12, 16 №-дээх уонна да атын, саамай дьон элбэх кэмигэр (чаас-пик) ыарахаттары көрсөр маршруппут хабыллыахтара. Биир VolgaBus ПАЗ оптуобустааҕар икки төгүл киэҥ: онно биир кэмҥэ 90-ча киһи батыан сөп», — диэн Дьокуускай куорат баһылыга Евгений Григорьев эттэ.