Дьокуускайга 9 суол саахала тахсыбыт, биир киһи эмсэҕэлээбит

От ыйын 9 күнүгэр Дьокуускай куорат сиригэр-уотугар 9 суол саахала бэлиэтэннэ, онтон бииригэр биир киһи эмсэҕэлээбит.

Бу туһунан Саха сиринээҕи Госавтоинспекция пресс-сулууспата иһитиннэрэр.

Ол курдук, киэһэ 16 чаас саҕана Намныыр суол 11-с км «Toyota Land Cruiser» массыына 60 саастаах суоппара хаҥас диэки эргийэригэр анал кытыы балаһатын эрдэттэн тутуспатах. Түмүгэр «Honda Fit»  мааркалаах массыыналыын харсыспыт. «Honda Fit» массыына суоппара эт-хаан эчэйиитин ылбыт уонна балыыһаҕа киирбит.

«Ытыктабыллаах суоппардар! Суол быраабылатын кытаанахтык тутуһаргытын санатабыт», — диэн Госавтоинспекция пресс-сулууспата сэрэтэр.