Дьокуускайга аан бастакытын тымныы уунан куттуу аан дойдутааҕы аахсыйаҕа кытыннылар

Норуоттар икки ардыларынааҕы «Быть здоровым — это модно!» спортивнай-патриотическай аахсыйа Дьокуускайга аан бастакытын «Северное сияние» хаар-муус пааркаҕа буолла. Тэрээһиҥҥэ 60 киһи кыттыыны ылла. Бу туһунан ТАСС иһитиннэрэр.

Бу тэрээһин Аҕа дойду Улуу сэриитигэр Кыайыы 80 сылыгар ананна. Саха сиринээҕи УГМС иһитиннэрбитинэн, куоракка салгын температурата күнүс 12:00 чааска -22С кыраадыс этэ. Аахсыйа 10 дойду 50 куоратыгар ыытыллыбыта биллэр.

Саха сиригэр физическэй култуура уонна маассабай успуорт управлениетын салайааччыта Роман Оконешников этэринэн, аахсыйа киин куоракка аан бастакытын ыытылынна. Оттон Арассыыйаҕа уонна атын дойдуларга номнуо 12-тэ буолан ааспыт, оттон быйыл 13-с төгүлүн буолла.

Арассыыйа Дьоруойа, Ил Түмэн дьокутаата Александр Колесов чөл олоҕу тутуһуу судаарыстыба тутаах хайысхатын көрдөрөр аахсыйа буоларын ыйда. «Аахсыйа чөл олоҕу тутуһууга билигин судаарыстыба тутаах хайысхатынан буолар, тоҕо диэтэххэ, биһиги билэрбит курдук, доруобай киһи — доруобай куттаах», — диэтэ кини.

Тэрээһин кэмигэр «Воин» ыччаты байыаннай-успуорка бэлэмнээһиҥҥэ уонна патриотическай иитиигэ киин отделениетын маастар-кылааһа буолла. Куттала суох буолууну ГИМС иниспиэктэрдэрэ хааччыйдылар.

Тымныы уунан куттарга сүбэлэр

Тымныы уунан куттан сайын саҕалыахха сөп. Бастаан сөрүүн ууттан саҕалааҥ, тута тымныы ууга кииримэҥ. Эбэтэр тымныыны кытта сылаас ууну уочаратынан куттан, эккитин-хааҥҥатын үөрэтиҥ.

Ууну бастаан атахха куттан саҕалыыбыт. Күн аайы үөһэ тахсан иһэбит, бастаан тилэхпитигэр, уллуҥахпытыгар эрэ куттубут буоллахпытына, сарсыныгар тобукпутугар диэри куттабыт, онтон – курданарбытыгар, салҕыы санныбытыттан саҕалаан, хаһыс да күнүгэр, үөрэннибит диэтэххитинэ, биэдэрэлээх ууну төбөҕүтүн таҥнары куттаҕыт.

Тымныы уунан куттуу урукку сылларга бэркэ тарҕана сылдьыбыта, киһи этин-хаанын чэбдигирдэр ньыма быһыытынан биллэр. Ол эрэн сорох ыарыылаах дьоҥҥо олох барсымыан сөп.

Киһи доруобуйатыгар саамай туһалаах – күөллэргэ, үрэхтэргэ сөтүөлээһин – манна уунан, салгынынан, күн сардаҥатынан эти-хааны тэҥинэн эрчийэбит.