Аҕа дойду Улуу сэриитин бэтэрээнэ Петр Яковлев 100 сааһын бэлиэтээтилэр

Дьокуускайга Аҕа дойду Улуу сэриитин бэтэрээнэ Петр Константинович Яковлев 100 сааһын туолуутун үөрүүлээх быһыыга-майгыга чиэстээтилэр. Бу бэлиэ күнүнэн үбүлүөйдээххэ «Үйэ саас» бочуоттаах бэлиэтэ туттарылынна .

Петр Константинович Яковлев 1925 сыллаахха от ыйын 12 күнүгэр Сунтаар улууһугар төрөөбүт. 1944 сыл бэс ыйыгар Сэбиэскэй Аармыйа кэккэтигэр ыҥырыллан, 61-с тааҥкалаах дивизия 61-с мотострелковай полкатыгар минометчигынан сулууспалаабыт.

Бэтэрээн Маньчжурияны дьоппуон импэрийэлиистэриттэн босхолооһуҥҥа кыттыбыт. Кэргэнинээн, Ирина Николаевналыын, түөрт оҕоломмуттар. Петр Константинович улахан дьиэ кэргэнигэр тапталлаах эһээ, хос эһээ аатын чиэстээхтик сүгэр.

«Мин – кини улахан кыыһын уолабын. Биһиги дьиэ кэргэммитигэр үбүлүөйдээх үс хос сиэнэ улаатар, уонна мин эһэм миэхэ иҥэрбит сыаннастарын – билиигэ-көрүүгэ, аан дойдуну билэргэ дьулууру – кинилэргэ тиэрдэ сатыыбын. Биһиги дьиэ кэргэммит олус улахан. Эһэбит түөрт оҕолоох, сэттэ сиэннээх уонна уонтан тахса хос сиэннээх. Бүгүн манна киниэхэ саамай күндү дьоно: амарах чугас дьоно, оҕо сааһын доҕотторо, уһун үлэ суолун бииргэ ааспыт, үөрүүтүн-хомолтотун үллэстибит кэллиэгэлэрэ муһуннулар», — диэн бэтэрээн сиэнэ Петр Чаарын кэпсээтэ.

Бырабыыталыстыба бэрэссэдээтэлин бастакы солбуйааччыта Дмитрий Садовников үбүлүөйдээххэ «Үйэ саас» бочуоттаах бэлиэни туттарда. Бу бэлиэ 1 мөлүйүөн солкуобай суумалаах төлөбүрдээх.

«Эһиги хорсун быһыыгыт уонна бэйэни харыстаммат үлэҕит түмүгэр, биһиги, бүгүҥҥү Арассыыйа көлүөнэтэ, эйэлээх олоҕу олоробут уонна дойдубут кэскилин түстүүбүт. Эһиги муударай сүбэҕит-амаҕыт уонна холобургут биһигини саҥа ситиһиилэргэ кынаттыыр. Эһиэхэ дириҥ махталбын тиэрдэбин. Чэгиэн, доруобай буолуҥ, чугас дьоҥҥут тапталларыгар, болҕомтолоругар угуттанан уһуннук, дьоллоохтук олоруҥ. Олоххут дьолунан-соргунан толору буоллун. Саха Өрөспүүбүлүкэтин Ил Дархана Айсен Николаев, өрөспүүбүлүкэ уһун үйэлээхтэрин үтүөлэрин билинэн, уһун үйэлээх буолууну өйүүр, үгэстэри уонна сиэр-майгы сыаннастарын харыстыыр сыалтан кинилэри наҕараадалыыр туһунан ыйаахха илии баттаабыта», — диэн Дмитрий Садовников эттэ.

«Бүгүн биһиги дойдуну сөргүтүүгэ киллэрбит кылаата сүҥкэн, сэрии уһулуччулаах бэтэрээнэ, үтүөлээх педагог Петр Константиновичка дириҥ ытыктабылбытын биллэрэбит. Бүгүн — ытыктыыр бэтэрээннэрбитин кытта көрсөр кыах бэриллибит бэлиэ күн. Бу — тыыннаах устуоруйаны кытта алтыһар, ааспыт кэм алдьархайдаах түгэннэрин туһунан туоһулар кэпсээннэрин истэр ураты кыах. Биһиги сорукпут – билиини иҥэринэн, устуоруйа кырдьыгын харыстыыр туһуттан кэлэр көлүөнэлэргэ тиэрдии буолар», — диэн Үлэҕэ уонна социальнай сайдыыга миниистирэ Елена Волкова бэлиэтээтэ.