Дьокуускайга Аҕа дойдуну көмүскээччилэр куубага саҕаланна

Дьокуускайга саҕаламмыт Аҕа дойдуну көмүскээччилэр куубагар 40 спортсмен кыттар. Спортсменнар 15 оройуонтан уонна Дьокуускайтан күрэхтэһэллэр.

Бүгүн, ыам ыйын 30 күнүгэр, Дьокуускай куорат «Дохсун» успуорт комплексыгар үөрүүлээх быһыыга-майгыга спортивнай тэрээһин  аһыллыыта буолла. Кыттааччылар уопсайа алта көрүҥҥэ киирсиэхтэрэ. Сүүрбэ бастыҥ спортсмен эрэгийиэннэр икки ардыларынааҕы күрэхтэһиигэ кыттар кыахтаныаҕа.

Тэрээһин аһыллыытыгар СӨ успуорка уонна физическэй култуураҕа миниистирэ Леонид Спиридонов кытынна. Кини байыаннай сулууспалаахтар адаптацияны ааһалларыгар успуорт суолтатын бэлиэтээтэ.

«Успуорт саҥа күүһү-кыаҕы биэрэр. Бэйэни сайыннарыыга, тупсарыыга көмөлөөх. Эһиги күрэхтэһиигэ кыттыыгыт ис туруккут, санааҕыт күүстээҕин туоһулуур. Эрэгийиэннээҕи түһүмэх бастыҥ кыттыылаахтара Арассыыйатааҕы турнирга өрөспүүбүлүкэбит чиэһин көмүскүөхтэрэ», — диэн миниистир бэлиэтээтэ.