Дьокуускайга ахсынньы 1 күнүгэр Саҥа дьыллааҕы сүрүн харыйа уота сандаарыа

Ахсынньы 1 күнүгэр Саха сирин киин куоратыгар сыл аайы ыытыллар «Кыһын Саха сириттэн саҕаланар» бэстибээл сүрүн тэрээһинэ – өрөспүүбүлүкэ  Саҥа дьыллааҕы сүрүн харыйатын уотун уматыыта буолуоҕа.

Үөрүүлээх сиэр-туом Өрөспүүбүлүкэ болуоссатыгар ыытыллыаҕа уонна 16:00 чааска саҕаланыа. Ыалдьыттары мунньуу уонна бырааһынньыктааҕы көрдөрүү 15:30 чаастан саҕаланар. Бу күн 17:00 чааска Орджоникидзе болуоссакка Дьокуускай куорат Саҥа дьыллааҕы харыйатын уоттара умайыахтара. Ыалдьыттары 16:30 чаастан саҕаланар бырааһынньыктааҕы бырагыраамаҕа ыҥыраллар. Ону кытта тэҥҥэ киин куоракка киэҥ култуурунай бырагыраама тэриллиэҕэ. 16:00 чаастан 19:00 чааска диэри Ф.И. Авдеева аатынан Оҕо айымньытын дыбарыаһыгар XIII «Бриллиантовые нотки» норуоттар икки ардыларынааҕы бэстибээл-куонкурус ыытыллыаҕа.

17:10 чааска бырааһынньыктааҕы Дьокуускай куорат тэрилтэлэрин үгэс буолбут массыыналарын холуоннатын параада салгыаҕа – холуонна Орджоникидзе болуоссатыттан тахсан, Доҕордоһуу болуоссатыгар диэри айанныаҕа. Бырааһынньыктааҕы күнү Ю.Е. Платонов аатынан Эстрада тыйаатырыгар 19:00 чааска буолар «Кыһын Саха сириттэн саҕаланар» киэһээҥҥи кэнсиэр түмүктүөҕэ.

«Кыһын Саха сириттэн саҕаланар» бэстибээл өрөспүүбүлүкэҕэ 2011 сылтан ыытыллар уонна  ирбэт тоҥҥо, хотугу ыалдьытымсах буолууга уонна эрэгийиэн ураты култуурунай үгэстэригэр ананар. 2025 сыллаахха бэстибээл сэтинньи 22 күнүттэн ахсынньы 6 күнүгэр диэри ыытыллар уонна үс сүрүн тэрээһини – «Бриллианты Якутии», «Вкус Якутии» уонна «Строганина», ону тэҥэ Дьокуускайга уонна өрөспүүбүлүкэ улуустарыгар 30-тан тахса эбии тэрээһини хабар. Бэстибээл Арассыыйа Бэрэсидьиэнэ Владимир Путин көҕүлээбит «Туризм уонна ыалдьытымсах буолуу» национальнай бырайыагын соруктарыгар сөп түбэһиннэрэн ыытыллар, ону тэҥэ туризмы сайыннарыыга уонна Саха сирин ураты култууратын тарҕатыыга туһуланар.