Дьокуускайга Александр Рыжиков кэриэһигэр бойобуой самбоҕа Бүтүн Арассыыйатааҕы турнир ыытылынна

Арассыыйа Дьоруойа Александр Рыжиков уонна сулууспалыы сылдьан подразделениелар өлбүт үлэһиттэрин сырдык кэриэстэригэр анаммыт бойобуой самбоҕа Бүтүн Арассыыйатааҕы турнирга күүстээх күрэсчиттэри быһаардылар. Бу туһунан ЯСИА иһитиннэрэр.

Күрэхтэһии Дьокуускайга, «50 лет Победы» успуорт дыбарыаһыгар, балаҕан ыйын 6 күнүгэр ыытылынна.

«Күрэхтэһиигэ Саха сириттэн, Нижегородскай уонна Амур уобаластарыттан 34 күрэсчит кытынна. Турнир ситиһиилээхтик ааста, мурун тостуутуттан ураты улахан эчэйии тахсыбата. Күрэхтэһии үгэс быһыытынан ыытыллар. Кэлэр сылга эмиэ тэриллиэҕэ уонна эрэгийиэннэртэн өссө элбэх киһи кыттыаҕа диэн эрэнэбит», — диэн күрэхтэһии сүрүн судьуйата Дмитрий Редин  кэпсээтэ.

Турнир кыттааччылара бэйэлэрин успуорка кулууптарын ааттарыттан кииристилэр. Кинилэр 58, 64, 71, 79, 88 уонна 98 киилэҕэ диэри ыйааһыннаах категорияларга арахсан күрэстэстилэр. Бары категорияларыгар кэриэтэ Саха сирин бэрэстэбиитэллэрэ кыайыылаах буоллулар: Федор Огоюкин (64 кг), Василий Сергеев (71 кг), Гэсэр Гатыпов (79 кг), Сафарали Сафаров (88 кг) уонна Павел Голубятников (98 кг).

58 киилэҕэ диэри ыйааһыҥҥа эрэ кыһыл көмүс Нижегородскай уобаласка барда, мэтээли Усман Орозбеков ылла. Арассыыйа Дьоруойа Александр Рыжиков уонна сулууспалыы сылдьан подразделениелар өлбүт үлэһиттэрин кэриэстээн ыытыллар күрэхтэһии үгэс быһыытынан Бүтүн Арассыыйатааҕы таһымҥа ыытыллар.

Александр Рыжиков 1960 сыллаахха ыам ыйын 27 күнүгэр Красноярскай кыраай Сухобузимскай оройуонун Кононово бөһүөлэгэр төрөөбүтэ. 1989 сылтан — ППС ротатын анал взводун хамандыыра. 1993-1996 сс. — өрөспүүбүлүкэ ИДьМ-н иһинэн үлэлиир милиция этэрээтин хамандыырын солбуйааччыта, ыстаап начаалынньыга, 1996 сылтан — Дьокуускайдааҕы ОМОН хамандыыра. Арассыыйа Дьоруойун аата 2000 сыллаахха ыам ыйын 29 күнүгэр, өлбүтүн кэннэ, иҥэриллибитэ.