Дьокуускайга алимеҥҥа иэстээҕи тутан, СИЗО-ҕа уктулар

Суут бириистэптэрин куораттааҕы салаатыгар Дьокуускай куорат 34 саастаах олохтооҕуттан алимент иэһин туһунан  дьыалата көрүллэр. Бу туһунан Саха сиринээҕи Суут бириистэптэрин пресс-сулууспата иһитиннэрэр.

Суут быһаарыытынан, эр киһи ый аайы дохуотун түөрт гыммыт биирин 3 саастаах уолун иитиитигэр ыытыахтаах, ол эрээри эбээһинэһин бэйэтин көҥүлүнэн толорбот эбит. Алимены төрүөттээх биричиинэтэ суох хаста да төлөөбөтүн иһин, холуобунай дьыала көбүтүллүбүт. Иэстээх дьыаланы кытта билсибит, онтон сүтэн хаалбыт.

Суут мунньаҕар буруйдаах кэлбэтэҕинэн сибээстээн, кинини ирдэбилгэ биллэриллибит. Сотору кэминэн суут бириистэбэ иэстээх ханна баар буолуон сөбүн туһунан иһитиннэриини ылбыт уонна дааннайдары полиция үлэһиттэригэр түргэнник тиэрдибит.

Полицейскайдар ол күн иэстээҕи Аллараа Бэстээх — Дьокуускай хайысханан паромҥа маршрутнай такситтан тутан, холуобунай дьыала көрүллэн, накаастабыл ананыар диэри СИЗО-ҕа  уктулар.