Дьокуускайга аныгы култуура бэстибээлэ буолла

Атырдьах ыйын 13 күнүгэр Дьокуускайга «Юность» стадиоҥҥа Ykt Geek Fest диэн аныгы култуура бэстибээлэ ыытылынна. Сыллата буолар куорат биир саамай улахан тэрээһинигэр быйыл 10 тыһыынча кэриҥэ киһи сырытта.

Ykt Geek Fest диэн тугуй?

2014 сыллаахтан сайын аайы Дьокуускай куоракка Ykt Geek Fest диэн ааттаах аныгы култуура бэстибээлэ ыытыллар. Манна киинэ, сэрийээл, муусука, кинигэ, көмпүүтэр оонньууларын уо.д.а. аныгы култуура уонна айар үлэ сэргээччилэрэ мустан биир күнү атаараллар. Тэрээһиҥҥэ араас куонкурустар, быыстапкалар, дьаарбаҥкалар, маастар-кылаастар, кэнсиэрдэр буоллаллар.

“Биһиги бэстибээлбит сүрүн суолтата – талааннаах ыччакка бэйэлэрин көрдөрөллөрүгэр кыаҕы биэрии. Сыл ахсын худуоһунньуктары, мусукааннары, эдэр суруйааччылары, “косплеердары” уо.д.а. айар үлэнэн дьарыктанар дьону бэстибээл былаһааккаларыгар кыттарга ыҥырабыт. Холобур, быйылгы тэрээһиҥҥэ киэҥник биллэ илик эдэр рок-бөлөхтөр кэлэн, сүрүн сыанаҕа 1000-тан тахса киһи иннигэр ырыаларын иһитиннэрдилэр”, — диэтэ тэрийээччи Егор Мандаров.

“Косплей”

Бэстибээл киэргэлэ уонна саамай биллэр бэлиэтэ — “косплей” дэнэр көстүүм куонкуруһа. Хас биирдии киһи сөбүлүүр киинэтин, сэрийээлин, мультигын, көмпүүтэр оонньуутун дьоруойун курдук таҥнан-симэнэн тэрээһиҥҥэ кэлиэн сөп. Көстүүмнээх дьоҥҥо тэрийээччилэр сыл ахсын хас даҕаны номинацияҕа икки хайысханан куонкурус биллэрэллэр – уопсай (хайдах баҕарар көстүүм буолуон сөп) уонна профессиональнай (кыттааччылар көстүүмнэрин 80% бэйэлэрин илиилэринэн оҥоһуллубут буолуохтаах).

Уопсай куонкуруска барыта аҕыс номинацияҕа кыайыылаахтары быһаардылар, ол иһигэр, “бастыҥ киинэ көстүүмэ”, “бастыҥ мультик көстүүмэ”, “бастыҥ оҕо көстүүмэ”, “бастыҥ бөлөҕүнэн көстүүм”, “бастыҥ тус бэйэ көстүүмэ” уо.д.а. Егор Мандаров бэлиэтээбитинэн, быйылгы куонкуруска 1500 курдук киһи сайаапка биэрэн кытынна.

Оттон профессиональнай куонкуруска 15 киһи бэйэтин илиитинэн көстүүм оҥостон кытынна. Кинилэр үлэлэрин Саха сирин бастыҥ “косплеердара Айаал Федоров, Анжелика Назарова уонна Карина Бахтина сыаналаатылар. Гран-при кыайылааҕынан “Dota-2” көмпүүтэр оонньуутун Рубик диэн персонаж көстүүмүн оҥорон таһаарбыт Андрей Конников буолла. Киниэхэ 50 тыһыынча солкуобайы туттардылар.

“Куонкуруска быйыл төрдүс сылбын кытынным, ол гынан баран, бастакыбын кыайдым. Оҥорбут үлэм сыанабыл ылбытыттан олус үөрдүм. Көстүүммүн уоппускам кэмигэр икки ый иһигэр оҥорон таһаардым. Элбэх кыра чаастардаах буолан, бэстибээлгэ диэри бүтэриэм суоҕа дии санаабытым, хата кэмигэр оҥорон көрдөрдүм”, — диэн Андрей санаатын үллэһиннэ.