Дьокуускайга арассаадаҕа наадыйыы үрдүк

Киин куорат Покровскайдыыр тракт 10 км «Три лимона» атыы-эргиэн киинин аттыгар арассаада атыыта үгэнниир кэмэ. «Сотору кэминэн арассаада атыыта түмүктэниэ, атыылаһа охсуҥ», — диэн атыыһыттар эттилэр.

Биһиги кэрэспэдьиэммит ырыынагы кэрийэ сылдьан, сыананы уонна туох арассаада атыыланарын хаартыскаҕа түһэрдэ.

Манна араас оҕуруот аһа, сибэкки, ону таһынан сэппэрээк, мас арааһа элбэх. Куһаҕана диэн сыанатын суруйбаттар эбит, онон анаан-минээн ыйыталаһыахха наада.

Хаппыыста арассаадата арыый да сыаналаах эбит, Бааһынай ырыынакка 60 солк. буоллаҕына, манна 100 солк. батараллар. Кабачок, биэрэс, баклажан – 80 солк. Помидор суорда элбэх — желый шар, добрыня никитич, бычье сердце, гора визавы — 80-100 солк.

Сүбүөкүлэ биир иһиккэ төһө элбэхтик ыһыллыбытынан көрөн, сыаната 80 солкуобайтан 100 солкуобайга диэри араастыыр. Клубника уонна дьэдьэн арассаадата суордуттан көрөн сыаната 300 солк. диэри халбаҥныыр.

Сибэкки суордуттан көрөн арааран атыылыыллар. Петуния сибэккилэр 80-150 солк. тураллар, бархатцы — 100-120 солк., георгиннар — 400 солк., анютины глазки — 80 солк. Душистый табак, астра, львиный зев, шафран сибэккилэр арыый сыаната үрдүк 120 солк., ону кытта перуанская дева — 150 солк. Саамай үрдүк сыаналаахтара цинния- 250 солк. уонна фуксия — 350 солк.

Питуния ампельнай — 150 солк., питуния талдал — 100 солк., питуния грани — 80 солк., оҕурсу — 100 солк.