Дьокуускайга арассаада маассабайдык атыыланар

Сыл ахсын киин куорат Хомсомуол болуоссата үүнээйи ырыынагар кубулуйар. Ол курдук, бу өрөбүллэргэ арассааданы атыылааһын ыытыллар. Бу барыта чааһынайдар, идэтийбит оҕуруотчуттар бүөбэйдээн үүннэрбит арассаадалара. Болуоссакка сүүһүнэн арассаада, дьэрэкээн сибэкки хото тэлгэммит.

Оҕуруот арассаадата ортотунан 50-80 солкуобайтан ыла саҕаланаллар. Оҕурсу, помидор, клубника, сүбүөкүлэ, хаппыыста, биэрэс араас суортара, сибэкки арааһа хас эрээт аайы ууруллубуттар. Холобур, оҕурсу сыаната — 80 солк., биэрэс — 80-90 солк., помидор сыаната — 50-80 солк.

Сибэкки арассаадата көрүҥүттэн көрөн ортотунан 80-90 солкуобайтан 300 диэри сыанаҕа атыыланар. Петуния сибэкки суортарынан сыаната араастаһар, эриэккэс сибэккилэр, моонньоҕон, хаптаҕас, ураты мастар сыаналара эмиэ добуоччу. Клубника уонна дьэдьэн сыаната — 200-250 солк.

Үгүс куорат олохтоохторо арассааданы атыылаһан ылар бары өттүнэн ордук дииллэр. Бастакытынан, сыаната удамыр. Иккиһинэн, ханна да ыраата барар ирдэммэт, куорат иһигэр баар.