Дьокуускайга Арассыыйа Дьоруойун Алексей Петрову чиэстээтилэр

Бүгүн, от ыйын 21 күнүгэр, Дьокуускайга Арассыыйа Дьоруойун «Медведь» позывнойдаах Алексей Петрову үөрүүлээх быһыыга-майгыга чиэстээтилэр.

Үөрүүлээх тэрээһиҥҥэ  өрөспүүбүлүкэ салалтата, байыаннай дьайыы байыастара, бэтэрээннэрэ, эдэр армеецтар, аймахтара, уопсастыбаннас, Дьокуускайга Үөһээ Бүлүү улууһун түмсүүтүн  бэрэстэбиитэллэрэ, биир дойдулаахтара  кытыннылар. Дьоруойу чиэстээһиҥҥэ Илиҥҥи байыаннай уокурук сэриилэрин командующайын солбуйааччы эбээһинэһин толорооччу Андрей Козлов кытынна.

Илиҥҥи байыаннай уокурук командующайын солбуйааччы эбээһинэһин толорооччу Андрей Козлов Алексей Петровка «Кыһыл сулус» мэтээли туттарда. «Ефрейтор Алексей Рафаэлович хорсун быһыыта биһиги судаарыстыбабыт, Саха Өрөспүүбүлүкэтин уонна Илин байыаннай уокурук сэриилэрин устуоруйатыгар суруллуоҕа. Алексей хорсун быһыыта биһиэхэ, барыбытыгар,  чаҕылхай холобурунан буолар», — диэн эттэ кини.

«Алексей Петров анал байыаннай дьайыыга байыаннай иэһи толорууга бэйэтин харыстаммакка көрдөрбүт хорсун, дьоруойдуу быһыыта холобур буолар. Кини уонунан өстөөх позицияларын ылыыга кыттыбыта, элбэх нэһилиэнньэлээх пууннары босхолоспута. Кыргыһыы кэмигэр Алексей Рафаэлович ыараханнык бааһырыыны ыллар даҕаны, ыарыытын, аахсыбакка, хорсунун, күүстээх санаалааҕын көрдөрдө. Кини тулуура, дьулуура уонна Аҕа дойдутугар бэриниилээх буолуута биһиги буойуннарбытын уонна Саха сирин олохтоохторун барыларын кынаттыыр, кыайыыга эрэлбитин бөҕөргөтөр», — диэн эттэ Ил Дархан Айсен Николаев.

Алексей Петров Саха сирин олохтоохторугар, дойду уонна өрөспүүбүлүкэ баһылыктарыгар кини байыаннай кылаатын үрдүктүк сыаналаабыттарыгар махтанна.

«Дойду Бэрэсидьиэнигэр Владимир Путиҥҥа анал байыаннай дьайыыга кыттыбыппын үрдүктүк сыаналаабытын иһин махтанабын. Бу наҕараада миэхэ улахан күүһү биэрэр. Махтал тылларбын Саха сирин баһылыгар Айсен Николаевка уонна өрөспүүбүлүкэ хас биирдии олохтооҕор анал байыаннай дьайыыга сылдьар уолаттарга көмөҕүт уонна өйөбүлгүт иһин аныыбын. Кыайыы биһиги диэки буолуоҕа!», — диэн Арассыыйа Дьоруойа Алексей Петров эттэ.

Бу күн Ил Дархан Алексей Петров 1,5 мөлүйүөн суумалаах сэртипикээти туттарда.