Дьокуускайга ардах түһэр, сорох оройуоннарга 35С куйаас буолуо

Саха сирин синоптиктара бүгүн, бэс ыйын 25 күнүгэр, үгүс оройуоннарга самыыр, этиҥнээх ардах түһэрин, оттон сорох уулуустарынан +35° диэри итийэрин сабаҕалыыллар.

Бу туһунан Саха сиринээҕи Гидрометеосулууспа тэрилтэтин саайта иһитиннэрэр. Үгүс оройуоннарга быстах, оттон Бүлүү бөлөх улуустарыгар, Алдан оройуонун илин өттүгэр, киин улуустарынан сорох сиринэн күүстээх самыыр, этиҥнээх ардах түһэрэ күүтүллэр.

Кыра тыаллаах, этиҥнээх ардах кэмигэр тыала сөкүүндэҕэ 15-20 м. диэри түргэннээх күүһүрүө.

Салгын температурата түүн +8…+13°, арҕаа +13…+18°, хоту +4…+9°, хоту байҕал  кытылынан -1…+4°. Күнүс +20…+25°, арҕаа, соҕуруу +26…+31°, соҕуруулуу-арҕаа +35° кыраадыска диэри итийэр, хоту +15…+20° буолуо.

Дьокуускайга түүн кыралаан ардыыр, күнүс самыырдыыр. Тыал соҕуруулуу-арҕааттан, күнүһүн хотугулуу-арҕааттан сөкүүндэҕэ 4-9 м. түргэннээх. Салгын температурата түүн +10…+12°, күнүс +20…+22° кыраадыс сылаас.