Дьокуускайга арыгы атыылыыр кафелар үлэлэрин тохтоттулар

Дьокуускай куорат дьаһалтатын пресс-сулууспата иһитиннэрбитинэн, бу сылга аҕыс ый иһигэр  административнай хамыыһыйа арыгы биисинэһигэр сыһыаннаах 126  дьыаланы көрбүт.

Ол курдук булуллубут кэһиилэргэ сокуону кэһэн туран ыйаммыт биллэриилэр, уопсастыбаннай бэрээдэги кэһии, санитарнай турук. 52 бэлиэтэммит түгэҥҥэ 2 мөлүйүөнтэн тахса суумалаах ыстараап олохтоммут.  Онон, бу кэмҥэ уопсайа 13 арыгы атыытынан эргинэр «сымыйа» кафелар сабыллыбыттар. Дьокуускай Аҕа баһылыга Евгений Григорьев бу үлэни салгыы көхтөөхтүк ыытарын туһунан иһитиннэрбит. Кини этэринэн, куорат олохтоохторо маннык арыгы атыылыыр тэрилтэлэртэн кыһалҕаланыа суохтаахтар диир.