Дьокуускайга атыы-эргиэн киинигэр сылдьан төлөпүөнү уорбут киһини туттулар

Дьокуускайдааҕы полиция 4-с нүөмэрдээх отделын дьуһуурунай чааһыгар биир олохтоох дьахтартан төлөпүөнүн уордарбытын туһунан сайабылыанньа киирбит. Бу туһунан ИДьМ «Дьокуускайдааҕы» салалтатын пресс-сулууспата иһитиннэрэр.

Полиция суһал көрдүүр тэрээһинин түмүгэр буруйдааҕы булбуттар. Уорбаланааччы урут сууттана сылдьыбыт, дьахтар билэр 38 саастаах киһитэ буолан тахсыбыт.

Быһаарбыттарынан, уоруу буолбут күнүгэр дьахтар атыы-эргиэн киинигэр үлэлии сылдьыбыт, онно билэр киһитэ кэлэн төлөпүөнүн уларсарыгар көрдөспүт. Дьахтар атын сиргэ барбытын кэннэ, уорааччы төлөпүөнү илдьэ куотан хаалбыт уонна кэлин атын дьоҥҥо атыылаан кэбиспит.

Киниэхэ РФ Холуобунай кодексатын 158-с ыстатыйатынан (Уоруу) холуобунай дьыала тэриллибит. Бу ыстатыйанан 5 сылга диэри хаайыыга барыахха сөп.