Дьокуускайга автосервис үлэһитэ итирик сылдьан киһини өлөрбүт

Дьокуускайга автосервис үлэһитин хаайдылар. Кини итирик сылдьан охсуһуу кэмигэр табаарыһын алҕас өлөрбүт. Быһылаан алтынньы 20 күнүгэр тахсыбыт.

Бу туһунан Саха сиринээҕи Силиэстийэлиир кэмитиэтин пресс-сулууспата иһитиннэрэр. Биэдэмистибэҕэ чуолкайдаабыттарынан, Лермонтов аатынан уулуссаҕа турар автосервис иһигэр 39 саастаах буруйданааччы табаарыһын кытта арыгы испиттэр уонна хайа эрэ кэмҥэ хом санаалааҕын өйдөөн кэлбит. Эр дьон икки ардыларыгар иирсээн кэнниттэн охсуһуу буолбут. Буруйданааччы эр киһи төбөтүн муостаҕа хас да төгүл  саайбыт. Ол кэннэ тыыммат буолбутун бэлиэтии көрөн, суһал көмөнү ыҥырбыт да, эмсэҕэлээччи суорума суолламмыт.

Эр киһини полиция үлэһиттэрэ силиэдэбэтэлгэ аҕалбыттар. Түмүгэр силиэдэбэтэл суут иннигэр буруйданааччыны тутатына хаайарга үҥсүү түһэрбит. Билигин холуобунай дьыаланан силиэстийэлиир үлэлэр ыытыллаллар.