Дьокуускайга баһаарга икки оҕо уонна эр киһи былдьаммыттарынан холуобунай дьыала тэрилиннэ

Дьокуускайга Халтурин уулуссаҕа турар икки этээстээх мас дьиэҕэ тахсыбыт баһаарга икки оҕо уонна эр киһи олохторо быстыбыт. Бу туһунан Саха сиринээҕи ЫБММ иһитиннэрэр. Алдьархай сэтинньи 6 күнүгэр күнүс буолбут. 50 кв. миэтэрэ иэннээх уот дьиэ бастакы этээһин хаппыт.

«Баһаар түмүгэр үс киһи – эр киһи уонна икки оҕо тыына быстыбыт. Өссө биир эр киһи эчэйиини ылбыт», — диэн Саха сиринээҕи ЫБММ иһитиннэриитигэр этиллэр. Силиэстийэлиир уорганнар дьон өлүгэ баһаары умуруоруу кэннэ көстүбүтүнэн бэрэбиэркэни ыыталлар. Бэрэбиэркэ түмүгүнэн быһаарыы ылыллыаҕа. Ону таһынан, борокуратуура баһаартан сэрэхтээх буолуу сокуонун ирдэбиллэрэ тутуһуллубутугар, элбэх кыбартыыралаах дьиэ уопсай баайа-дуола хайдах көрүллүбүтүгэр уонна да атын боппуруостарга сыанабыл биэриэҕэ. Баһаарга эмсэҕэлээбит гражданнар дьиэнэн-уотунан хааччыллар бырааптара борокуратуура хонтуруолугар тутуллар.

Дьокуускай куорат мэра Евгений Григорьев бэйэтин ТГ-ханаалыгар суруйбутунан, бу алдьархай 11 уонна 14 саастаах икки оҕо олоҕун быста. Баһаары умуруоруу кэмигэр түөрт киһи быыһанна, сүүрбэ киһи көһөрүлүннэ. Дьиэҕэ уопсайа 24 ыал пропискалаах. Бу дьиэ 2017 сыл сэтинньитигэр саахалланар туруктааҕынан ааҕыллыбыт уонна бырагыраама саҥа түһүмэҕинэн көһөрүллүөхтээх эбит.

Дьокуускай куоракка олорор дьиэҕэ тахсыбыт баһаарга үс киһи, ол иһигэр икки оҕо, сэрэҕэ суох быһыыттан өлүүгэ тиэрдии түбэлтэтинэн холуобунай дьыала тэрилиннэ. Ол туһунан Саха сиринээҕи Силиэстийиэлиир управление иһитиннэрэр. Силиэдэбэтэллэр-криминалистар уонна оперативнай сулууспалар түбэлтэ буолбут сирин көрдүлэр. Дьыаланы силиэстийэлииргэ суолталаах маллар-саллар ылылыннылар, экспэртииһэлэр ананнылар. Туох буолбутун толору чуолкайдыыр үлэ ыытыллар. Холуобунай дьыала силиэстийэтин хаамыыта Силиэстийэлиир управление салалтатын хонтуруолугар турар.