Дьокуускайга Байыаннай дьайыы бэтэрээннэрин күнүгэр сибэкки дьөрбөтүн уурдулар

Дьокуускайга от ыйын 1 күнүгэр Байыаннай дьайыы бэтэрээннэрин күнүгэр аналлаах сибэкки дьөрбөтүн ууруу үөрүүлээх тэрээһин сиэрэ-туома буолла.

Мемориальнай комплекска бэтэрээннэр, анал байыаннай дьайыы кыттыылаахтара, охтубут байыаннай сулууспалаахтар ийэлэрэ уонна кэргэттэрэ, былаас уонна уопсастыбыннас бэрэстэбиитэллэрэ муһуннулар, диэн Дьокуускай куорат Дууматын пресс-сулууспата иһитиннэрэр.

Буойун хорсун быһыытыгар анаммыт хоһоон истиҥ тылларын доҕуһуолунан, мустубут дьон биир мүнүүтэ чуумпунан туран, охтубуттар сырдык кэриэстэрин чиэстээтилэр.

Пааматынньыкка бастакынан охтубут байыаннай сулууспалаахтар ийэлэрэ уонна кэргэттэрэ сибэкки дьөрбөтүн  уурдулар. Миитиҥҥэ Ил Түмэн Бэрэссэдээтэлин солбуйааччыта — Байыаннай сулууспалаахтар, байыаннай дьайыы бэтэрээннэрин дьыалаларыгар, патриотическай иитии уонна уопсастыбаннай тэрилтэлэр боппуруостарыгар сис кэмитиэтин бэрэссэдээтэлэ Александр Подголов, Дьокуускай куорат баһылыга Евгений Григорьев, Арассыыйа Дьоруойа Александр Колесов, Дьокуускай куорат Дууматын бэрэссэдээтэлин бастакы солбуйааччыта Евдокия Евсикова, куорат Дууматын дьокутааттара Александр Северьянов, Ольга Шерстянникова уонна Наталья Луковцева кытыннылар.

«Бүгүн биһиги дойдубутун саа-саадах тутан көмүскээбит дьоҥҥо ытыктабыл сүгүрүйүүбүтүн тиэрдэбит. Кинилэр хорсун быһыылара уонна бэйэни харыстаммакка сылдьыылара – бары көлүөнэҕэ холобур буолар», — диэн Евдокия Евсикова бэлиэтээтэ.