Дьокуускайга байыаннай дьайыы кыттыылааҕа, тириэньэр Станислав Потапов кэриэһигэр боксаҕа турнир саҕаланна

Сэтинньи 13 күнүгэр Дьокуускайга Р.М. Дмитриев аатынан олимпийскай эрэллэри бэлэмниир училищеҕа талааннаах тириэньэр, байыаннай дьайыы кыттыылааҕа, физическэй култуура уонна успуорт, үөрэхтээһин туйгуна уонна «Хорсунун иһин» уордьан кавалера Станислав Потапов кэриэһигэр анаммыт мемориальнай дуоскаҕа сибэкки дьөрбөтүн ууруута уонна боксаҕа өрөспүүбүлүкэтээҕи турнир үөрүүлээх аһыллыыта буолла, диэн СӨ Успуорка министиэристибэтин пресс-сулууспата иһитиннэрэр.

СӨ Физическэй култуураҕа уонна успуорка миниистири бастакы солбуйааччы Гаврил Мохначевскай, Ил Түмэн Ыччат дьыалаларыгар, физическэй култуураҕа уонна успуорка сис кэмитиэтин бэрэссэдээтэлэ Георгий Балакшин, «Ньурба оройуона» муниципальнай оройуонун баһылыгын солбуйааччы Михаил Пан, Арассыыйа Дьоруойдара Андрей Григорьев уонна Алексей Петров, Р.М. Дмитриев аатынан Өрөспүүбүлүкэтээҕи олимпийскай эрэллэри бэлэмниир училище дириэктэрэ Семен Чердонов, успуорт үтүөлээх маастара, өрөспүүбүлүкэ Боксаҕа федерациятын бэрэссэдээтэлин солбуйааччы Василий Егоров, ону тэҥэ Станислав Потапов аймахтара уонна чугас дьоно кыттыыны ыллылар.

«Бүгүн успуорт эйгэтэ мустан, олоҕун өрөспүүбүлүкэҕэ бокса сайдыытыгар уонна ыччаты иитиигэ анаабыт биһиги бииргэ үлэлээбит киһибит, доҕорбут Станислав Семенович аатын үйэтитэ, киниэхэ убаастабылбытын биллэрэ кэллибит. Кини 2022 сыл балаҕан ыйын 22 күнүгэр мобилизацияҕа ыҥырыллыбыта. Бойобуой табаарыстара кинини чиэһинэй, хорсун, бойобуой тыыны көтөҕөр кыахтаах киһинэн ахталлар. Хорсун, эрэллээх быһыытын иһин Станислав Потапов «Хорсунун иһин» уордьанынан наҕараадалааммыта. Кини 2023 сыл от ыйын 24 күнүгэр инники кирбиигэ олоҕун толук уурбута. Күрэсчиттэргэ чаҕылхай уонна чиэһинэй киирсиилэри баҕарабын. Бу турнир эһиэхэ саҥа, улахан кыайыыларга дабайар үктэлинэн буоллун»,- диэн эҕэрдэ тылыгар СӨ Физическэй култуураҕа уонна успуорка миниистири бастакы солбуйаччы Гаврил Мохначевскай эттэ. Күрэхтэһии сэтинньи 14-15 күннэригэр Р.М. Дмитриев аатынан олимпийскай эрэллэри бэлэмниир училище боксаҕа саалатыгар ыытыллар.

Турнир бырагыраамата:

• Сэтинньи 14 күнэ: 08:00–09:00 – кыттааччылары ыйааһыннааһын  14:00 – полуфиналлар.
• Сэтинньи 15 күнэ: 08:00–09:00 – ыйааһыннааһын; 14:00 – финал киирсиилэрэ, наҕараадалааһын уонна турнир үөрүүлээх сабыллыыта.