Дьокуускайга байыаннай эпэрээссийэ кыттыылаахтарын өйүүр аһымал кэнсиэрдэр буолуохтара

• Олунньу 26 күнүгэр А.Е.Кулаковскай аатынан Норуоттар доҕордоһууларын дьиэтигэр «Москва уонна Саха сирин мусукааннара – Арассыыйа Аармыйатыгар!» диэн икки аһымал кэнсиэр буолуоҕа. Аахсыйаттан киирбит үбүнэн байыаннай подразделениелары кытта сүбэлэһэн анал прибордары, тэриллэри ылан Саха сириттэн сылдьар байыаннай сулууспалаахтарга тириэрдиэхтэрэ.

Бырайыакка Москва уонна өрөспүүбүлүкэ мусукааннара кытталлар. Кинилэр кэккэлэригэр Арассыыйа биллиилээх джазмена, виртуоз-саксофониһа, «Коктебель джаз пати» норуоттар икки ардыларынааҕы джазовай бэстибээл арт-дириэктэрэ, ырыа ааптара уонна толорооччу Сергей Головня кыттыаҕа.

Ону тэҥэ, Стас Лешкевич бөлөҕө, эстрада уонна джаз ырыаһыта, А.О.Королла салайар оркестрын солистката, «Голос-8» шоу кыттыылааҕа, Алдан улууһун Аллараа Кураанах бөһүөлэгин олохтооҕо Валерия Миронова, эстрада уонна джаз ырыаһыта, пианист, аранжировщик, «SunVoice» джазовай бөлөх салайааччыта, «Голос-7» шоу кыттааччыта Сергей Архипов бааллар.

Саха сириттэн “Туймаада” судаарыстыбаннай вокальнай ансаамбыл, өрөспүүбүлүкэ норуодунай артыыстара Екатерина, Алексей Егоровтар, Артем Евмененко, Алексей Егоров — Өркөн уонна Андрей Егоров — Харысхан бэйэлэрин ырыаларын бэлэхтиэхтэрэ.

Бырайыакка тыас-уус режиссера Геннадий Вдовенко кыттар. Кини 12 сыл устата биллиилээх Иосиф Кобзоҥҥа тыас-уус солбуллубат режиссерунан үлэлээбитэ.

Бырайыак бастакы аһымал кэнсиэрэ былырыын сэтинньигэ “Саха сирин виртуозтара” ансаамбыл кыттыылаах «Москонцерт Холлга» буолбута.

Бырайыак салайааччыта – Арассыыйа продюсера, ырыа ааптара, Өлүөхүмэ улууһун Дабаан сэлиэнньэтиттэн төрүттээх Федор Анучин.

Аахсыйа РФ Бэрэсидьиэнигэр СӨ Бастайааннай бэрэстэбиитэлистибэтин, Тас сибээс уонна СӨ норуоттарын дьыалаларын министиэристибэтин, СӨ Култууратын уонна духуобунай сайдыытын министиэристибэтин, А.Е.Кулаковскай аатынан Норуоттар доҕордоһууларын дьиэтин өйөбүллэринэн ыытыллар.

СӨ Ил Дарханын уона Бырабыыталыстыбатын пресс-сулууспата.