Дьокуускайга байыастар оҕолоро өрөбүлгэ катокка босхо сылдьыахтара

Кыһыҥҥы кэм саҕаламмытынан, «Аҕа дойдуну көмүскээччилэр» судаарыстыбаннай пуонда Саха сиринээҕи филиала байыаннай дьайыы бэтэрээннэрин дьиэ кэргэттэригэр уонна өлбүт байыастар дьиэ кэргэттэригэр анаан «СВОбодный лед» бырайыагы сөргүттэ.

Былырыын саҕаламмыт бырайыак киэҥник тарҕанан иһэр. Хас өрөбүл аайы Аҕа дойдуну көмүскээччилэр оҕолоро “Эллэй Боотур” успуорт ураҕайыгар баар катокка босхо киириэхтэрин сөп.

Бу оҕолорго успуордунан дьарыктаналларыгар, биир саастыылаахтарын кытта алтыһан, таһаарыылаахтык сынньаналларыгар бэртээхэй кыаҕы биэрэр.

«Кыыспын кытта “Эллэй Боотур” катокка сылдьан олус сөбүлээтибит! Көбүс көнө муус, доҕордуу эйгэ, үчүгэй муусука. Салайааччыбытыгар Анна Андреевнаҕа өйөбүлүн уонна өрүү туһалаах информацияны этэрин иһин ураты махталбын тиэрдэбин», — диэн Уһун Ньургууна Уйгун кыыһа, байыаннай дьайыыга охтубут байыас дьиэ кэргэнин чилиэнэ санаатын үллэһиннэ.

«СВОбодный лед» бырайыак чэрчитинэн босхо хаҥкылыырга суруттарарга «Аҕа дойдуну көмүскээччилэр» судаарыстыбаннай пуонда филиалын салайар социальнай координаторын кытта сибээстэһиҥ, диэн иһитиннэрэр Ил Дархан, бырабыыталыстыба пресс-сулууспата.