Дьокуускайга Бастакы Бэрэсидьиэн М.Е. Николаев аатынан саҥа оскуола аһылынна

Балаҕан ыйын 1 күнүгэр Дьокуускайга өссө биир саҥа оскуола аанын тэлэччи арыйда. Бу Бастакы Бэрэсидьиэммит М.Е. Николаев аатын сүгэр 40 №-дээх орто оскуола “Ыччат уонна оҕолор” национальнай бырайыагынан тутуллубут.

Үөрүүлээх тэрээһиҥҥэ Ил Дархан Айсен Николаев кэлэн, Михаил Николаев аатынан саҥа оскуола аһыллыбытынан учууталлары, үөрэнээччилэри, төрөппүттэри истиҥник эҕэрдэлээтэ.

“Биһиги 17,2 тыһ.кв.м. иэннээх өрөспүүбүлүкэҕэ саамай улахан, саамай элбэх үөрэнээччилээх, бары өттүнэн бастыҥ хааччыллыылаах оскуоланы арыйан эрэбит. Михаил Николаев үөрэхтээһини куруук өйүүр этэ, үөрэтиини-иитиини болҕомтотугар илдьэ сылдьара. Кини үөрэхтээһиҥҥэ киллэрбит кылаатын билинэн туран, Михаил Ефимович аата бу бэртээхэй оскуолаҕа иҥэриллибититтэн олус үөрэбит”, — диэтэ Айсен Николаев. Салгыы Ил Дархан Михаил Николаев олохтообут Бэрэсидьиэн оскуолаларын ситимин Бастакы Бэрэсидьиэн оскуолаларын ситимэ диэҥҥэ уларытан ааттаабытын иһитиннэрдэ. Бу ситимҥэ 13-с оскуоланан 40 №-дээх оскуола эмиэ киллэриллибитин мустубут дьон уруйдуу көрүстүлэр.

“Галина Прокопьевна бу оскуоланы өрөспүүбүлүкэ биир бастыҥ кыһата оҥороругар эрэнэбит, улахан эппиэтинэс ыллыгыт, оскуолаҕытын харыстааҥ, ситиһиилээхтик үөрэниҥ, дьоһун дьон буолуҥ”, — диэн туран, Ил Дархан пилота суох көтөр аппарааттар кылаастарын бэлэхтээтэ.

Бу кэнниттэн Арассыыйа Федерациятын былааҕын өрө көтөҕөр чиэс байыаннай дьайыылар бэтэрээннэрэ Максим Ивановка, эдэр армеец Айыына Исаковаҕа уонна спортсмен Айаал Ивановка бэрилиннэ.

Куорат дьаһалтатын баһылыга Евгений Григорьев өрөспүүбүлүкэ көмөтүнэн кэлиҥҥи сылларга куоракка саҥа таас тутуулар элбээбиттэрин бэлиэтээтэ.

“Соторутааҕыта аҕай манна быраҕыллыбыт дьиэлэр, гараастар турбуттара. Тутааччылар үлүгэрдээх үлэлэрин түмүгэр бу барыта уларыйда”, — диэн кинилэргэ улахан ытыктабылын биллэрдэ.

Бу күн тутааччылар дьон-сэргэ махталын ылыахтарын ыллылар. “РФА-Инвест” тутуу хампаанньатын производственнай салаатын начаалынньыгар Петр Масаевка “СӨ үтүөлээх тутааччыта” бочуоттаах аат иҥэрилиннэ.

Оскуола дириэктэрэ Галина Васильева дьоро күнүнэн кэлбит ыалдьыттары, кэллиэгэлэрин, үөрэнээччилэри сахалыы сайаҕастык эҕэрдэлээтэ. Кэрэ оскуоланы бэлэхтээбит РФ Бэрэсидьиэнэ  Владимир Путиҥҥа, Ил Дархаҥҥа махталын тиэртэ.

“Дириэктэр быһыытынан оскуола сайдарын туһугар күүспүн-кыахпын барытын ууруом. Чиэстээхтик, эппиэтинэстээхтик Бастакы Бэрэсидьиэммит аатын илдьэ сылдьыахпыт”, — диэтэ.

Мустубут дьон истиитигэр Михаил Николаев кэс тылын иһитиннэрдилэр. Онно харда курдук үөрэнээччилэр, эн ааккын өрө тутуохпут, оҕоҕо-ыччакка туһаайбыт кэскиллээх үлэҕин салгыахпыт диэтилэр.

Биллэн турар бу күн туох баар болҕомто саҥа оскуола маҥнайгы кылааһын үөрэнээччилэригэр ананна. Бу күн 140 оҕо аан бастаан оскуола боруогун атыллаата. Чуораан кылыгырыыр тыаһынан саҥа үөрэх дьыла аһыллыбыта бэлиэтэннэ. Ол кэннэ аалай кыһыл лиэнтэни быһан, саҥа оскуоланы киирэн көрөргө ыҥырдылар.

Сүдү киһибит аатын сүгэр оскуолаҕа үөрэнэр, үлэлиир улахан чиэс буоллаҕа. Үлэ кэлэктиибигэр, үөрэнээччилэргэ бу үрдүк ааты түһэн биэрбэттэригэр эрэнэбит.

1 “Б” кылаас салайааччыта Александр Андросов: “2021 сыллаахха Нам педколлеһын бүтэрэн, Уус Алдан улууһун Суотту Хоноҕоругар түөрт сыл үлэлээтим. Быйыл бу куоракка  саҥа оскуола аһылларын истэн үлэҕэ киирдим. Икки саха кылааһа аһыллыбытыттан, бииригэр салайааччынан ананным, 32 оҕолоохпун: 14 уол, 17 кыыс. Саҥа оскуолаҕа үлэлиирбиттэн олус үөрэбин”, — диэтэ.

Роботтары хамсата сылдьар дуоска таһыгар робототиэхиньикэни үөрэтэр куруһуок салайааччыта Елизавета Михайловна хаһыс да сылын оҕолорго үөрэтэрин кэпсээтэ:

“Билиҥҥи кэмҥэ робототиэхиньикэ биир саамай оҕо интэриэһиргиир дьарыга буолан турар. Манна бырагыраамалааһын да баар, конструирование да баар, онон наһаа астыналлар. Куруһуокка суруйтарыы бүгүҥҥэттэн саҕаланар, баҕалаах оҕо элбэх. Робототиэхиньикэнэн дьарыктаммытым төрдүс сыла, бу иннинэ чааһынай оскуолаҕа үлэлээбитим.

7 “б” кылаас үөрэнээччитэ Уйгун Егоров бу иннинэ 6 №-дээх оскуолаҕа үөрэммит. Саҥа оскуола аһыллыбытыгар төрөппүттэрэ манна көһөрбүттэр.

“Дьиэм мантан чугас. Урукку кылааспыттан өссө биир оҕо манна киирбитэ. Үөрэхпэр үчүгэйбин, саҥа кылааска саҥа доҕоттордуун үөрэниэхпит. Оскуоланы кэрийэн көрбүппүт, наһаа үчүгэй”, — диэн кэпсээтэ.