Дьокуускайга бастыҥ ювелирнай оҥоһуктар быыстапкалара аһылынна

 Бүгүн киин куоракка Казначейство саалатыгар “Саха сирин бастыҥ ювелирнай оҥоһуктара-2024” быыстапка аһылынна.

Тэрээһин “Кыһын Саха сириттэн саҕаланар” кыһыҥҥы туризм бэстибээл чэрчитинэн ыытыллар. Быыстапкаҕа  21 маастар-ювелир кыттыыта уонна 74 саҥа оҥоһуктары киэҥ араҥа дьүүлүгэр таһаарыы — хас биирдии оҥоһукка маастар айар дьоҕурун, кыаҕын, мындыр толкуйун билиһиннэрии. Ол курдук, хас биирдии оҥоһук киэргэтии эрэ буолбакка, маастар буочарын ураты көрүүтүн көрдөрөр дьиҥнээх уус-уран айымньы буолар.

Быыстапка киэргэл саҥа сүүрээннэрин кытта билсэргэ, ону тэҥэ үрдүк таһымнаах маастардар уус-уран оҥоһуктарын сэҥээрээччилэргэ бэртээхэй кыаҕы биэрэр.

“Кыһын Саха сириттэн саҕаланар” кыһыҥҥы туризм бэстибээл чэрчитинэн аһыллыбыт быыстапка б.дь. ахсынньы 29 күнүгэр диэри үлэлиэҕэ. Кэлиҥ, сылдьыҥ, сэргээҥ.