Дьокуускайга “Белый пароход” киинэ премьерата буолла

“Белый пароход” —  ааспаты-арахпаты ахтыы  уонна тапталга бэринии  икки ардыларыгар сөптөөх быһаарыыны ылыныы судургута суоҕун көрдөрөр мистическай дыраама.

Инга Шепелева “Белый пароход” сэһэнинэн суруллубут киинэни 2024 с. устубуттар. Сүрүн оруолларга Элла Соколова, Александр Кошкидько, Роман Атласов оонньууллар, хос продюсер – Степан Бурнашев.

Киинэ хайыы үйэ  араас бэстибээллэр  кыайыылаахтарынан буолбут.

“Белый пароход” – саха хормейстер-учууталын уонна мусукаалынай оскуола учууталынан Москваттан ананан кэлбит дириэктэр тапталларын устуоруйата. Икки култуура утары турсуута, урукку тапталтан хомойуу-хоргутуу  атын таптал устуоруйатыгар хайдах сабыдыаллыырый? Ону бу киинэни көрбүт киһи  бэйэтэ хайдах өйдүүрүнэн ылыныан сөп. Киинэҕэ бэйэ-бэйэни кытары кэпсэтии, үөрүүлээх-көтүүлээх түгэннэр аҕыйахтар. Ол оннугар 20 сыл устата күүстээх  таптал ахтылҕанынан олорбут учуутал  Мартаны  оонньуур Элла Соколова аҕыйах саҥатынан уонна хараҕын “оонньуутунан” киинэ сюжетын толкуйдатарга күһэйэр. Дьиктитэ диэн, кини аҥаардас көхсүнэн да турдаҕына, кини ис туругун таайаҕын.  Киинэҕэ муусука күннээҕи олох сүрүн көстүүтүн быһыытынан уонна ускуустубаҕа, дьылҕаҕа  бэринии күүстээхтик көрдөрүллүбүт. Ону сэргэ, биллэн турар, саха итэҕэлэ, мистика дьайыылара саха киһитэ үрдүкү күүстэргэ эрэнэрин  кэрэһэлиир.

Киинэҕэ сүрүн оруоллары сэргэ,  муусука эйгэтин үлэһиттэрэ, Дьокуускай куорат мусукаалынай оскуолаларын үөрэнээччилэрэ уонна преподавателлара кытталлар.

Киинэни  Элла Соколова 20-чэ сыл  үлэлии сылдьар  мусукаалынай кэллиэһигэр уһулбуттар.

“Мин дьоруойум – дьиҥ бэйэбиттэн олох атын киһи. Дьиҥнээх олохпор мин үөрэ-көтө сылдьабын. Уопсайынан, саха мифологиятыгар ойуун дьахтар ханнык да ойууннааҕар күүстээх. Хас биирдии киһи бэйэтэ ойуун күүстээх”, — диир сүрүн оруолу толорбут Элла Соколова.

Режиссер Инга Шепелева Саха сиригэр төрөөбүтэ, 2009 с. Горькай аатынан Литература институтун, 2021 сыллаахха Москватааҕы киинэ оскуолатыгар “игровой киинэ” режиссерун идэтин  бүтэрбитэ.

Киинэ өрөспүүбүлүкэҕэ бэс ыйын 19 күнүттэн көстүөҕэ.