Дьокуускайга бөлүүн буолбут баһаартан эмсэҕэлээбиттэргэ анаан гуманитарнай көмө хомуллар

Дьокуускайга бөлүүн Борисовка-2 уулусса 1-кы №-дээх дьиэтигэр буолбут баһаартан эмсэҕэлээбит дьоҥҥо анаан гуманитарнай көмөнү хомуйан эрэллэр. 60 киһини эвакуациялаан, Гагаринскай уокурук управатыгар быстах кэмҥэ олохтоотулар.

Баҕалаах дьон бородууктанан, иһэр уунан уонна сылаас таҥаһынан (куопта, куурка, колгуокка, бэргэһэ, атах таҥаһа), итиэннэ хаһаайыстыбаҕа туттуллар малынан, төлөпүөнү сэрээттиир тэриллэринэн көмөлөһүөхтэрин сөп. Көмөнү маннык аадырыска туталлар: Можайскай уул., 13/3г, 1-кы куорпуһа.

Санатан суруйдахха, балаҕан ыйын 28 күнэ үүнэр түүнүгэр Дьокуускай куоракка Борисовка-2 уулуссатын 1-кы №-дээх дьиэтигэр баһаар буолбута. Уот барыта 400 кв. м. иэннээх сиринэн дьиэ тас бараанын уонна тоҕус кыбартыыраны ылбыта. Хомойуох иһин, баһаарга биир эр киһи тыына быһынна, итиэннэ 1967 с.т. дьахтар эчэйбитэ.