Дьокуускайга биэс сыл иһигэр 164 км суол тутулунна

2019 сылтан саҕалаан Дьокуускайга «Куттала суох хаачыстыбалаах суоллар» национальнай бырайыагы олоххо киллэрии чэрчитинэн 164 км суол оҥоһулунна, 51 км тротуар уурулунна, 15 км кэриҥэ бэлэсипиэт тэбэр суол баар буолла. Итиэннэ 3,5 тыһ. тахса суолу сырдатар уот тардылынна, 2,3 тыһ. тахса уот остуолбата туруорулунна.

2023 сылга Дьокуускайга бу национальнай бырайыак чэрчитинэн 29,56 км аспааллаах суол өрөмүөннэммит. 14 км. тахса тротуар ууруллубут, 5 км. кэриҥэ бэлэсипиэт тэбэр суол олоххо киирбит. 1070 суолу сырдатар уот уонна 460 уот остуолбата турбут.

«Куттала суох хаачыстыбалаах суоллар» национальнай бырайыагы 2019 сылга Арассыыйа бэрэсидьиэнэ Владимир Путин көҕүлээһининэн олоххо киллэрэн барбыттара. Онтон ыла Саха сиригэр 3 тыһыынча км кэриҥэ суол ууруллубута, 50 ууну туоруур күрбэлэр оҥоһуллубуттара.

Киин куорат биэс национальнай бырайыактарга кыттар, олор олоххо киирэллэригэр 2019-2023 сылларга 17,5 млрд солк. көрүллүбүтэ, онтон 5,5 млрд солк. – 2023 сылга.

Ордук элбэх үп ааспыт сылга «Куттала суох хаачыстыбалаах суоллар» (3,2 млрд.солк.) уонна “Үөрэҕирии” (1,8 млрд.солк.) национальнай бырйыактары олоххо киллэриигэ кэлбиттэрэ биллэр.