Дьокуускайга биир баарга 16 саастаах оҕоҕо арыгы атыылаабыттар

Дьокуускай куорат 2 №-дээх полициятын сокуоннай саастарын ситэ илик оҕолор дьыалаларыгар иниспиэктэрдэрэ рейдэ кэмигэр киин куорат Стадухин аатынан уулуссаҕа турар баарга сокуоннай сааһын ситэ илик оҕоҕо арыгыны атыылааһынын чахчытын арыйдылар.

Бу туһунан  Саха сиринээҕи ИДьМ пресс-сулууспата иһитиннэрэр. Атыыһыт 16 саастаах оҕоҕо арыгыны атыылаабыт уонна сааһын туоһулуур докумуоннары бэрэбиэркэлээбэтэҕэ быһаарылынна. Атыыһыкка сыһыаннаан административнай боротокуол оҥоһулунна. Арыгыны миэстэтигэр былдьаатылар.

Полицияҕа сокуоннай сааһын ситэ илик оҕолорго арыгыны атыылааһын бобулааҕын санаттылар. Атыылааччы оҕо сааһын туоһулуур докумуонун ирдиир эбээһинэстээх, өскөтүн кини сокуоннай сааһын туолбутугар саарбахтааһыннар баар буоллаҕына. Арыгы атыытыгар сокуону кэһии чахчыларын сэрэтиигэ, булууга уонна туоратыыга профилактическай рейдэлэр салҕаналлар.