Дьокуускайга биир нэдиэлэ иһигэр 190 лиитирэ арыгы былдьанна

Дьокуускайга ааспыт нэдиэлэҕэ, тохсунньу 19-тан 25-гэр диэри, сокуону кэһэн арыгыны атыылааһын аҕыс түбэлтэтэ тахсыбыта быһаарылынна, административнай боротокуоллар оҥоһулуннулар, 190 лиитирэ аһыы утах былдьанна. Бу туһунан киин куорат баһылыга Евгений Григорьев иһитиннэрдэ.

Итирик туруктаах 23 суоппар тутулунна. «Сымыйа кафеларга», баардарга, түүҥҥү кулууптарга уонна да атын арыгы атыылыыр сирдэргэ араас сокуону кэһиилэринэн 15 боротокуол оҥоһулунна. Ону таһынан, Евгений Григорьев «ВКонтакте» ситимигэр суруйарынан, нэдиэлэ иһигэр куорат олохтоохторуттан арыгы эйгэтигэр сокуону кэһиилэр тахсыбыттарын тустарынан түөрт иһитиннэрии киирбит. Олор бары салгыы бэрэбиэркэҕэ анаан сөптөөх уорганнарга ыытылыннылар. Куорат баһылыга иһитиннэрбитинэн, ааспыт сыл балаҕан ыйыттан уопсайа 127 иһитиннэрии киирбит.