Дьокуускайга Биир санаанан терроризмы утары охсуһар күҥҥэ аналлаах аахсыйа ыытыллыаҕа

Балаҕан ыйын 3 күнүгэр Дьокуускайга Доҕордоһуу болуоссатыгар 14.00 чаастан 19.00 чааска диэри Бүтүн Арассыыйатааҕы Биир санаанан терроризмы утары охсуһар күҥҥэ аналлаах аахсыйалар ыытыллыахтара, диэн иһитиннэрэр СӨ Ил Дарханын уонна Бырабыыталыстыбатын пресс-сулууспата.

Тэрээһин кэмигэр тэрийээччи-аниматордар ИДьМ үлэһиттэрин кытта бэйэҥ баҕаҕынан дактилоскопическай регистрацияны барар аахсыйаны ыытыахтара.

Маны таһынан “Уопсастыбаҕа терроризм куттала” маастар-кылаас ыытыллара былааннанар. Манна теракт, солуокка тутан ылыы кэмигэр хайдах гынарга куттал суох буолуутун быраабылаларын быһаарыахтара. Бастакы мэдиссиинискэй көмөнү хайдах оҥорору, ИДьМ үлэһиттэрэ бэйэни көмүскэниигэ маастар-кылаастары көрдөрүөхтэрэ. Кинологтар ыттарын кытта хайдах үлэлииллэрин билиһиннэриэхтэрэ.

Ону тэҥэ “Холууп – эйэ бэлиэтэ”, “Терроризмтан, экстремизмтан быһыы” аахсыйалар ыытыллыахтара.