Дьокуускайга Бокса аан дойдутааҕы күнүгэр профессиональнай боксаҕа киирсии буолуоҕа

Атырдьах ыйын 27 күнүгэр Дьокуускайга Орджоникидзе аатынан болуоссакка аан дойду бокса күнүгэр профессиональнай боксаҕа киирсии ыытыллыаҕа.

Киин куорат дьаһалтата, СӨ боксаҕа Федерацията уонна «Сахапрофбокс» промутерскай хампаанньа куорат олохтоохторун уонна боксаны таптааччылары профессиональнай боксаҕа саха спортсменнарын киирсиитигэр ыҥыраллар.

Рингэҕэ эдэр спортсменнар тахсан күөн көрсүөхтэрэ  — Чурапчы сэлиэнньэтин олимпийскай резервэтин училищетыттан Николай Макаров уонна Дьокуускайтан «Peek-a-boo» кулууп боксаҕа тириэньэрэ Айаал Васильев.

«Сахапрофбокс» хампаанньа Саха боксердарын профессиональнай рингэҕэ  кытыннарыыга, Саха сиригэр профессиональнай боксаны тарҕатыыга анаан үлэлиир. Буолаары турар киирсии туһунан «Сахапрофбокс» промоутерскай хампаанньа салайааччыта Николай Дьячковскай кэпсээтэ.

«Биһиги профессионалбыт — Петр Васильев, Петр Егоров, Михаил Варламов, Василий Егоров, Назар Андреев номнуо үчүгэй ситиһиилэрдээхтэр, уопуттаахтар уонна профессиональнай рингэҕэ кыайыылаах тахсаллар. Евгений Николаевич Григорьев көмөтүнэн Африка боксердара кыттыылаах «Хотуттан ыҥырыы» профессиональнай бокса бастакы киэһэтэ ыытыллыбыта. Бу киэһэ сылын ахсын ыытыллаҕа. Атырдьах ыйын 27 күнүгэр, бокса аан дойдутааҕы күнүгэр, Орджоникидзе болуоссатыгар эдэр талааннаах боксердар кыттыылаах профессиональнай киирсии ыытыллыаҕа. Кыттааччылар харчынан сэртипикээттэри, куубактары, бириистэри ылыахтара. Кэлиҥ, астына, дуоһуйа дьиҥнээх киирсиини көрүҥ!»,- диэн Николай Дьячковскай ыҥырар.