Хаартыска: Национальнай бибилэтиэкэ.
«Большая страна — Большая книга» Бүтүн Арассыыйатааҕы литературнай-сырдатар бырайыак бастакы түһүмэҕинэн, Дьокуускайга Арассыыйа аныгы литературатын бэрэстэбиитэллэрэ, «Большая книга» бириэмийэ лауреаттара, суруйааччылар Виктор Ремизов, Сергей Беляков, кириитик Иван Родионов кэлэн, үлэлээн, ааҕааччылары кытта көрсөн бардылар.
Балаҕан ыйын 13 күнүгэр Н.Д. Неустроев аатынан SMART-бибилэтиэкэҕэ «Суруйааччы уонна кэм: аныгы нуучча литературатын сүрүн сыаннастара, хайысхалара уонна сайдыытын суоллара» диэн тиэмэҕэ төгүрүк остуол буолан ааста.
Төгүрүк остуолга кыттыыны ыллылар: аныгы нуучча литературатын биллиилээх суруйааччылара, кириитиктэрэ – Иван Родионов, Сергей Беляков, Виктор Ремизов уонна саха суруйааччылара, бибилэтиэкэ үлэһиттэрэ. Тэрээһини суруйааччы, суруналыыс, чинчийээччи, Саха сирин Суруйааччыларын ассоциациятын бырабылыанньатын бэрэссэдээтэлэ Олег Сидоров иилээн-саҕалаан ыытта.
Төгүрүк остуол кыттааччылара аан дойдуга литература суолтатын, дойду социальнай-экономическай балаһыанньатыгар уонна култууратыгар литература сабыдыалын туһунан кэпсэттилэр. Эдэр суруйааччылары уонна саҥа литература түмсүүлэрин өйүөххэ, литература сурунаалларыгар ураты болҕомто ууруохха наада диэн санааларын эттилэр.
Национальнай бибилэтиэкэ историческай саалатыгар буолбут көрсүһүүгэ суруйааччылар историческай арамааны, документальнай кинигэни хайдах суруйар туһунан кэпсээтилэр, кистэлэҥнэрин үллэһиннилэр. Сергей Беляков этэринэн, аныгы ааҕааччы халыҥ кинигэттэн куттаммат уонна дойду устуоруйатын билиэн баҕарар.
— Бу аныгы Арассыыйа биир бастыҥ литературнай бырайыага. Суруйааччылары, литератордары, кириитиктэри өйүүр, дьоҥҥо киэҥник сырдатар сыаллаах. Саха сирин олохтоохторо бу бырайыагы уонна бириэмийэ лауреаттарын, аныгы суруйааччылар айымньыларын үчүгэйдик билиэхтэрин баҕарабын, — диэн култуура, духуобунай сайдыы миниистирэ Афанасий Ноев эттэ.
Маны тэҥэ, суруйааччылар Хотугулуу-Илиҥҥи федеральнай университекка устудьуоннары, айар ыччаты кытта көрүстүлэр.
«Большая страна – Большая книга» литературнай-сырдатар бырайыак «ОТОН.фест» бастакы өрөспүүбүлүкэтээҕи дьиэ кэргэн патриотическай бэстибээлин чэрчитинэн ыытылынна.
Тымныы күн-дьыл турбутунан, Горнай, Нам, Хаҥалас уонна Чурапчы улуустарыгар муниципалитеттар икки ардыларынааҕы оптуобус сырыыта быстах…
«Буратино» киинэ уопсай хомуура 1,5 млрд солкуобайы куоһарда. Бу Киинэ пуондатын Биир кэлим автоматизированнай информационнай…
sakha-sire.ru саайт «Кэпсээннэ истиэҕиҥ» диэн бырайыагар «Саха сирэ» хаһыат суруналыыһа, суруйааччы Ангелина Васильева-Дайыына "Тайах оҕото"…
Өрөспүүбүлүкэҕэ эми-тому атыылаһыыга уонна тарҕатыыга сыһыаннаах эмп-том хааччыйыытын ньымалара тохсунньу 9 күнүгэр СӨ Ил Дархана…
Ньурба улууһугар полиция үлэһиттэрэ Саҥа дьыл түүнүгэр тыаҕа муммут уонна суолга хаарга хаайтарбыт массыыналаах ыалга…
Дьокуускай куорат борокуратуурата криптовалютаҕа инвестициялыыр аатыран дьон үбүн-харчытын уорууга сыһыаннаах холуобунай дьыаланы суукка ыытта. Бу…