Дьокуускайга бутлегеры туттулар, 80-ча лиитэрэ арыгыны былдьаатылар

Дьокуускайдааҕы 4 №-дээх полиция отделын учаастактааҕы боломуочунайдара Клара Цеткин уулуссаҕа олохтоох секторга  арыгы бородууксуйатын сокуоннайа суох атыылыыр эдэр уолу туттулар.

Силиэстийэ быһаарбытынан, 28 саастаах эр киһи «Тойота Краун» массыынатын иһиттэн испиирдээх бородууксуйанан эргинэр эбит. Тырааныспары бэрэбиэркэлиир кэмҥэ 79 лиитэрэттэн тахса арыгы бородууксуйата былдьанна.

Сокуону кэспит эдэр уолга РФ Административнай Кодексатын 14.17.1 ыстатыйатын 1 чааһынан («Физическэй сирэйдэр арыгылаах уонна испиирдээх ас-үөл бородууксуйатын сокуона суох чааһынай атыылааһыннара») административнай боротокуол оҥоһулунна.

Бу ыстатыйанан 30-тан 50 тыһыынчаҕа диэри солкуобай кээмэйдээх административнай ыстараап көрүллэр. Арыгы сокуонун эйгэтигэр сокуону кэһии чахчыларын сэрэтэр, арыйар уонна бохсор сыаллаах полиция сэрэтэр рейдэлэрэ салҕаналлар, диэн Саха сиринээҕи ИДЬМ пресс-сулууспата иһитиннэрэр