Дьокуускайга бырааһынньыктарга арыгы атыытын боборго этии киллэрдилэр

Дьокуускайга куоракка улахан бырааһынньыктар ыытыллар кэмигэр арыгыны атыылыыры хааччахтыырга этии киллэрдилэр, диэн «Эхо столицы» ТГ-ханаала иһитиннэрэр.

От ыйын 1 күнүгэр, оптуорунньукка, куорат уопсай мунньаҕын кэмигэр киин куорат уокуруктааҕы дьаһалтатын быраапка Департаменын салайааччыта иһитиннэрбитинэн, нуормалыыр-быраап докумуонун бырайыага номнуо бэлэмнэммит уонна сөбүлэһиннэрии түһүмэҕин ааһа сылдьар.

Анатолий Илларионов бу көҕүлээһин аҥардас Туймаада ыһыаҕын эрэ буолбакка, атын да улахан бырааһынньыктары, холобур, Арассыыйа күнүн хабарын бэлиэтээтэ. Докумуон эспэртииһэ кэнниттэн Ил Түмэн дьокутааттарын биһирэбилин ылыахтаах.

Санатан эттэххэ, ыам ыйын 8 уонна 9 күннэригэр Дьокуускайга куорат киинигэр уонна дьон мустар сирдэригэр арыгы атыытын хааччахтаабыттара, оттон ыам ыйын 24 күнүгэр оскуолаларга бүтэһик чуораан ыытылларынан сибээстээн бобуу киллэриллэ сылдьыбыта. Ону таһынан Туймаада ыһыаҕын кэмигэр Үс Хатыҥ сиригэр-уотугар хааччахтааһын үлэлээбитэ.