Дьокуускайга быстах кэмҥэ быыбардааччылар олорор сирдэринэн быыбардыыр учаастактара тэриллибиттэрэ

Биир телеграм-ханаалга харах баайыыта (фантом) буолар учаастактааҕы быыбардыыр хамыыһыйалар тустарынан суруйуу тахсыбыта.

Ааптар онно биэс учаастактааҕы быыбардыыр хамыыһыйаны (№814, №828, №829, №830, №831) ааттаабыт, итиэннэ Дьокуускай куорат территориятааҕы быыбардыыр хамыыһыйатын уонна Саха Өрөспүүбүлүкэтин Киин быыбардыыр хамыыһыйатын саайтарыгар суох дааннайы суруйбут.

«Бу туох учаастактааҕы быыбардыыр хамыыһыйаларай, ханна баалларый, ким куоластыырый уонна хаһан кинилэри тэрийбиттэрий – ол туһунан ханна даҕаны иһитиннэрии суох. Онно иккис күн 100 бырыһыан куоластаабыттарын туһунан эрэ иһитиннэрии баар. Мин, арааһа, ити фантом-учаастактар кимҥэ куоластаабыттарын билэбин быһыылаах», — диэн ааптар суруйбут.

Саха Өрөспүүбүлүкэтин Киин быыбардыыр хамыыһыйата иһитиннэрбитинэн, СИЗО-ҕа баар уонна балыыһаҕа сытар гражданнар быыбардыыр бырааптарын туһаналларын хааччыйар сыалтан тустаах тэрилтэлэр салайааччылар көрдөһүүлэринэн уонна Саха Өрөспүүбүлүкэтин Киин быыбардыыр хамыыһыйатын кытары сөбүлэһии быһыытынан территориальнай быыбардыыр хамыыһыйаларга быстах кэмҥэ быыбардааччылар олорор сирдэригэр быыбардыыр учаастактар тэриллэллэр. Ол курдук Дьокуускай куорат сиригэр-уотугар итинник 814, 828, 829, 830, 831 №-дээх быыбардыыр учаастактар буолаллар.

«814 №-дээх быыбардыыр учаастак СИЗО-ҕа тэриллэн, бу категорияҕа киирсэр быыбардааччылар, тэрилтэ салайааччытын быһаарыытынан, балаҕан ыйын 10 күнүгэр эрэ куоластыыллар, ол иһин балаҕан ыйын 9 күнүгэр кинилэр быыбарга кыттыылара 0% турар. Оттон 828 №-дээх (Мэдиссиинэ национальнай киинэ), 829 №-дээх (Социальнай хааччыйыы өрөспүүбүлүкэтээҕи киинэ), 830 №-дээх (2-с №-дээх Өрөспүүбүлүкэтээҕи балыыһа – Мэдиссиинэ суһал көмөтүн киинэ), 831 №-дээх (Дьокуускайдааҕы өрөспүүбүлүкэтээҕи клиническай балыыһа) быыбардыыр учаастактар мэдиссиинэ тэрилтэлэригэр тэриллибиттэрэ. Бу үөһээ ыйыллыбыт мэдиссиинэ тэрилтэлэрин быыбардааччыларын испииһэгэр балыыһаҕа сытан эмтэнэр ыарыһахтар тус сайабылыанньаларынан эрэ киирэллэр. Бу учаастактарга куоластааһыҥҥа 100 % кыттыбыттарын, сайабылыанньа биэрбит эрэ гражданнар куоластаабыттарынан быһаарыахха сөп», — диэн уонна Саха Өрөспүүбүлүкэтин Киин быыбардыыр хамыыһыйатыгар чопчулаан эттилэр.