Дьокуускайга быстыбыт боруобаттан уокка оҕустаран оҕо өлбүт

От ыйын 27 күнүгэр, баскыһыанньаҕа, күнүс 15 чаас саҕана Широких-Полянскай уулуссаҕа 3 №-дээх дьиэтин аттыгар алдьархай быһылаан таҕыста — уот лииньийэтин быстыбыт боруобаттан уокка оҕустаран 2017 сыллаах төрүөх оҕо өлбүт диэн Дьокуускай куорат уокуругун дьаһалтатын пресс-сулууспата иһитиннэрдэ.

Билиҥҥи туругунан «Якутскэнерго» АУо салайар хампаанньаны уонна Сайсары уокуругун управатын кытыннаран силиэстийэ ыытыллар. Холуобунай дьыала тэрилиннэ. Бэнидиэнньиккэ куорат уопсай планеркатыгар «Якутскэнерго» бэрэстэбиитэлэ иһитиннэрбитинэн, быһылаан төрүөттэрин уонна буруйдаахтары быһаарар туһунан саҥа иһитиннэрии суох.

Мэрия оҕо төрөппүттэригэр, аймахтарыгар уонна чугас дьонугар дириҥ кутурҕанын биллэрдэ уонна көмүүнү тэрийэргэ дьиэ кэргэҥҥэ материальнай көмөнү оҥоруох буолан эрэннэрдэ.