Дьокуускайга быыһааччы оҕолору уратытык эҕэрдэлээтэ

Быыһааччы күнүгэр, ахсынньы 27 күнүгэр,  1 №- дээх педиатрия Национальнай мэдиссиинэ киинигэр «Десант Дедов Морозов» Бүтүн Арассыыйатааҕы аахсыйанан быһааччы оҕолору Саҥа дьылынан эҕэрдэлээтэ.

Тымныы Оҕонньор көстүүмүн кэтэн быыһааччы  альпинистскай оборудованиены туһанан оҕолорго дьиэ үрдүттэн түстэ.

Тэрээһини СӨ Оҕо быраабын боломуочунайа уонна «Навигаторы детства» федеральнай бырайыагы олоххо киллэриигэ эрэгийиэннээҕи киин тэрийдилэр. Сонун аахсыйаҕа 30-ча оҕо кытынна — Тымныы Оҕонньортон истиҥ эҕэрдэлэри, бэлэхтэри туттулар.

Бүтүн Арассыыйатааҕы устудьуоннар куорпустарын эрэгийиэннээҕи салаатын салайааччыта Ренат Фабрин бу ураты Саҥа дьыллааҕы эҕэрдэни тиэрдиигэ, оҕолорго бырааһынньыгы тэрийиигэ көмөлөспүтүнэн олус үөрэрин туһунан эттэ.  СӨ Оҕо быраабын боломуочунайа Туйаара Васильева иһитиннэрбитинэн, аахсыйа бу сыл ахсынньы 24 күнүгэр Арассыыйа Бэрэсидьиэнин иһинэн Оҕо быраабыгар боломуочунай Мария Львова-Белова көҕүлээһининэн  ыытыллар. Кэлэр өттүгэр «Десант Дедов Морозов» сылын ахсын ыытыллар үгэскэ кубулуйара былааннанар, диэн СӨ Ил Дарханын  уонна Бырабыыталыстыбатын пресс-сулууспата иһитиннэрэр.