Дьокуускайга дьахтар бииргэ арыгылаабыт эр киһитэ харчы уорбут

Дьокуускай куорат полициятын отделыгар уоруу туһунан олохтоох дьахтартан сайабылыанньа киирбит.

Дьахтар комиссионнай маҕаһыыҥҥа кыһыл көмүс сыабы сыана аҥаарыгар туттарбыт, онтон төттөрү ыларыгар төлөбүр сууматыттан ордубут 30 тыһ.солк. уоруллубутун билбит. Билигин кини кыһыл көмүс сыабын төттөрү ыларыгар 50 тыһыынча солкуобайы төннүннэриэхтээх.

Холуобунай ирдэбил үлэһиттэрэ урут сууттана сылдьыбыт Нам оройуонун 43 саастаах олохтооҕун туппуттар. Кэлин биллибитэ уорбаланааччы уонна эмсэҕэлээччи дьахтар бииргэ арыгы испиттэр. Салгыы арыгы атыылаһарга харчы бүппүтүгэр, дьахтар кыһыл көмүс сыабы туттарарга санаммыт. Кыһыл көмүс сыап харчытын комисионнай маҕаһыыҥҥа бииргэ кыттыһан төлүүргэ быһаарыммыттар.

Киэргэли эр киһи аатынан туттарбыттар. Маҕаһыыҥҥа кыһыл көмүс сыабы 50 тыһыынча солкуобайга сыаналаабыттарын үрдүнэн, 20 тыһыынча солкуобайы эрэ ылбыттар. Ол эрээри, кэнники хара санаалаах эр киһи маҕаһыыҥҥа иккитэ төннүбүт уонна хаалбыт 30 тыһыынча солкуобайы ирдээн ылбыт.

Холуобунай дьыала тэрилиннэ. Уорбаланааччы биэс сылга диэри болдьоххо көҥүлэ быһыллыан сөп.