Дьокуускайга биэнсийэлээх дьахтар түөкүттэргэ 3 мөл. солк. ыыппыт

Ааспыт өрөбүллэргэ полицияҕа түөкүттэр сиэртибэлэрэ буолбут Дьокуускай куорат икки олохтооҕо тыллаабыт. Бу туһунан өрөспүүбүлүкэтээҕи ИДьМ  пресс-сулууспата иһитиннэрэр.

77 саастаах биэнсийэлээх дьахтары «счекка баар харчыгын көмүскүүбүт» диэн аатыран албыннаан, 2 950 000 солкуобайдаах  мунньуммут харчытын уорбуттар.

Терапевт-бырааска түөкүттэр суотабай сибээс операторын уонна Киин баан аатыттан кубулунан эрийбиттэр. Икки күн иһигэр хара санаалаахтар дьахтары кирэдьиит оҥотторон, 865 тыһыынча солкуобайы кинилэр ыйбыт счеттарыгар ыытарга итэҕэппиттэр.

Санатан эттэххэ, аферистар сиэртибэ буолуон сөптөөх дьону кытта видео-сибээһинэн эрийэн уонна биллэрии сервистэринэн сибээстэһэллэр, чэпчэки билиэттэри уонна чэпчэки инвестициялары оҥорууга этии көтөҕөллөр, оҥоһуу өйү туһаналлар.