Дьокуускайга 1500 үөрэнээччи харантыыҥҥа барда

Дьокуускайга  дьаҥ-дьаһах (ОРВИ) өрө туран оскуола оҕолоро харантыыҥҥа бардылар. 

Куорат үрдүнэн 54 оскуолаттан харантыыҥҥа тоҕус үөрэх кыһата барда. Билиҥҥитэ 1500 үөрэнээччи харантыыҥҥа олорор. Үөрэх управлениетыгар иһитиннэрбиттэринэн, үөрэнээччилэр уопсай сыыппараларыттан 2,7% тэҥнэһэр диэн ЯСИА суруйар. Ону таһынан муниципальнай уһуйааннартан сэттэ бөлөх, ол эбэтэр 171 иитиллээччи эмиэ харантыыҥҥа барбыт. Билигин үөрэх кыһаларын үлэһиттэригэр уонна оҕолорго  кирииби утары быһыы туруоруу кэмэ саҕаланна. Сэрэтэр үлэлэр хас биирдии оскуолаларга, уһуйааннарга ыытылла туралларын биэдэмистибэҕэ иһитиннэрбиттэр.

Бэлиэтээн суруйдахха, кылаастан оҕо ахсааныттан 20% оҕо ыалдьыбыт  буоллаҕына харантыыҥҥа барыы буолар, ону сэргэ дьиэттэн олорон үөрэниигэ көһүөхтэрин сөп.