Дьокуускайга Дмитрий Коркин аатынан көҥүл тустууга турнир ыытыллыаҕа

Дмитрий Коркин аатынан  эр дьон ортотугар XVI норуоттар икки ардыларынааҕы көҥүл тустуу турнира сэтинньи 15-16 күннэригэр Дьокуускайга ыытыллыаҕа. Киэҥ далааһыннаах күрэхтэһиигэ, үгэс курдук, Арассыыйа уонна атын дойдулартан кэлбит күүстээх тустууктар көбүөргэ тахсыахтара.

Быйылгы турнирга аан дойду 10-тан тахса дойдутуттан уонна Арассыыйа 8 эрэгийиэниттэн 200-тэн тахса күрэсчит кыттыыны ылыаҕа. Дмитрий Коркин аатынан норуоттар икки ардыларынааҕы күрэхтэһии ытык ыалдьытынан Сеулга уонна Москваҕа буолбут Олимпиада оонньууларын кыайыылааҕа, хас да төгүллээх Аан дойду уонна Европа чөмпүйүөнэ Сергей Белоглазов буолар.

СССР, РСФСР уонна ЯАССР үтүөлээх тириэньэрэ Дмитрий Коркин аатынан норуоттар икки ардыларынааҕы турнир – Саха сирин тустуутун сүрүн күрэхтэһиитэ уонна аан дойду таһымнаах тэрээһин.

Ааспыт сылга Саха сирин хамаандата үрдүк таһымҥа бэлэмнээх буолан, турнирга икки көмүс, биир үрүҥ көмүс уонна үс боруонса мэтээли ылбыта. Турнир кыайыылаахтарынан өрөспүүбүлүкэ чиэһин көмүскээччилэрэ Лев Павлов, Александр Авелов буолбуттара.

Санатан эттэххэ, Дмитрий Коркин аатынан бастакы турнир 1985 сыллаахха Чурапчыга буолбута. Салгыы 1987 сыллаахха күрэхтэһии Бүтүн Сойуустааҕы статустаах, онтон 2008 сылтан – норуоттар икки ардыларынааҕы таһымнаах буолбута. 2008-2011 сылларга турнир «50 лет Победы» успуорт дыбарыаһыгар, оттон 2012 сылтан – «Триумф» успуорт уораҕайыгар ыытыллыбыта.