Дьокуускайга Дмитрий Коркин кэриэһигэр турнир үөрүүлээх арыллыыта буолла

Дьокуускайга «Өрөгөй» успуорка бэлэмнэнии киинигэр Дмитрий Коркин кэриэһигэр норуоттар икки ардыларынааҕы турнир үөрүүлээх быһыыга-майгыга аһылынна. 

«Саха сиригэр икки сыл буолан биһиги улуу киһибит кэриэһигэр Дмитрий Коркиҥҥа анаан норуоттар икки ардыларынааҕы турнир  саҕаламмытынан спортсменнары, тириэньэрдэри, ыалдьыттары, көрөөччүлэри итиитик-истиҥник эҕэрдэлиибин. Турнирга Арассыыйа эрэ буолбакка, аан дойду күүстээх тустууктара кытта кэллилэр. Ол курдук, 13 дойдуттан 190-тан тахса киһи кыттар», — диэн Ил Дархан Айсен Николаев эҕэрдэ тылыгар эттэ.

Салгыы Саха сирин тустууга оскуолатын чаҕылхай  иитиллээччилэрин — «Гражданскай килбиэн» бэлиэнэн тустуук Владимир Егоровы, Ил Дархан Махтал суругунан Виктор Рассадины, Эдуард Григорьевы наҕараадалаатылар.