Дьокуускайга Доҕордоһуу болуоссатыгар Пиэрибэй Маайга анаммыт тэрээһиннэри дьон сэргээтэ

Бүгүн, ыам ыйын 1 күнүгэр, киин куоракка «Дорообо, Күөх Маай!» диэн бырааһынньыктааҕы үөрүүлээх тэрээһиннэр буола тураллар.

Доҕордоһуу болуоссатыгар күнүс 13 чааска Д.К. Сивцев-Суорун Омоллоон аатынан Опера уонна балет тыйаатырын иннигэр бу тыйаатыр солистарын, 15 чааска — Дьокуускайдааҕы Обургу оҕолор киинин иитиллээччилэрин кэнсиэрдэрэ буолбута. Бу чааска М.Е. Николаев аатынан Мэдиссиинэ национальнай киинин үлэһиттэрэ ырыа-тойук түһүлгэтин тэрийдилэр.

Оонньуур былаһааккаҕа «Дорообо, Пиэрибэй маай!» диэн ыччаттарга аналлаах эстэпиэтэ буола турар.

Дьон-сэргэ Күөх Маайы уруйдуур-айхаллыыр бырааһынньыкка көхтөөхтүк кыттар.