Дьокуускайга «дрифтээбит» суоппар 170 тыһ. солк. ыстарааптанна

Өрөспүүбүлүкэ киин куоратын уулуссаларыгар «дрифтээбит» 27 саастаах Дьокуускай олохтооҕо холуобунай дьыалатыгар бириигэбэрэ таҕыста.

Кини РФ Холуобунай Кодексатын 267.1 ыстатыйатынан буруйдааҕынан ааҕылынна. Суут матырыйаалларыттан көстөрүнэн, 2024 сыл балаҕан ыйыгар Дьокуускай икки олохтооҕо эрдэттэн кэпсэтэн, «Toyota Mark II» уонна «Toyota Altezza» массыыналарынан, суол быраабылатын кэспиттэр: светофор кыһыл уотугар тохтообокко ааспыттар, утары суолга тахсыбыттар уонна «дрифтээбиттэр». Бу дьайыылар атын суол кыттааччыларын олохторугар уонна доруобуйаларыгар кутталы үөскэппиттэр. Буруйданааччы буруйун билиммитинэн суут 170 000 солкуобай кээмэйдээх ыстараабы анаата. Бириигэбэр сокуоннай күүһүгэр киирэ илик.

«Toyota Altezza» массыынаны ыыппыт дрифт иккис кыттааччытыгар тэриллибит холуобунай дьыала өлбүтүнэн сибээстээн эрдэ тохтотуллубут, диэн Дьокуускай куорат борокуратуурата иһитиннэрэр.