Дьокуускайга эбэҥкилэр “Бакалдын” бырааһынньыктара саҕаланна

Бэс ыйын 6-8 күннэригэр самаан сайыны уруйдуу Бүлүүлүүр аартыкка Кэҥкэмэ үрэх таһыгар “Бакалдын-2025” эбэҥкилэр үгэс буолбут бырааһынньыктара ыытыллар.

Тэрээһин патриотизм бэлиэлээх буолар. Бырааһынньыгы тэрийээччи – Уус Маайа улууһа.

Бырааһынньык ыалдьыттара эбэҥкилэр баай култуураларын, үтүө үгэстэрин билсиэхтэрэ, күрэхтэһиэхтэрэ. Ураһаларын туруоруохтара, вокальнай куонкуруска кыттыахтара. Бэс ыйын 7 күнүгэр күнү көрсүү сиэрэ-туома күүтэр. Кэнсиэр, норуот маастардарын быыстапката, гастро-шоу, Николай Атласов астаабыт эбэҥки куукунатын аһын амсайыы ыытыллаллар.

Биллэр виртуоз-баянист Владимир Боярскай кыттыаҕа. “Победа за нами” диэн улуустар патриоттуу аахсыйалара буолуоҕа. Арассыыйа Эбэҥкилэрин ытык сүбэтин бэрэссэдээтэлэ  Иван Атласов этэринэн, өссө 1991 с. бастакы “Бакалдын” буолбута.

“Бакалдыны Саха сирин үрдүнэн ыытар буолбуттара үөрүүлээх. Соҕуруу оройуоннарга Икэнипкэ, атын оройуоннарга уонна Саха сирин тас да өттүгэр “Бакалдыны” бэлиэтииллэр”, — диэтэ Иван Атласов.

Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата