Дьокуускайга эдэр уол 50 тыһ.солк. суумалаах көмүс биһилэҕи уоран тутулунна

ИДьМ сулууспатын 4 №-дээх полиция отделын дьуһуурунай чааһыгар Дьокуускай куорат олохтооҕо сыаналаах көмүс биһилэҕин уорбуттан туһунан сайабылыанньа суруйбут. Хоромньу 50 тыһ. солк. тэҥнэспит.

ИДьМ иһитиннэриитинэн, суһал-ирдиир тэрээһиннэрин түмүгэр холуобунай ирдэбил үлэһиттэрэ уорбаланааччыны лиичинэһин быһаарбыттар. Урут уорууга сууттана сылдьыбыт 21 саастаах олохтоох киһи буолара биллибит.

Силиэстийэ быһаарыытынан, эр дьон уулуссаҕа билсибиттэр. Ол кэннэ эмсэҕэлээччи саҥа билсибит киһитин кытта билсиһиилэрин бэлиэтээри ыалдьыттата ыҥырбыт.

Арыгыны иһэн баран, сарсыныгар эр киһи көмүс биһилэҕин булбатах. Уоруллубут малы буруйдаах атыылыырга былааннаабыт да, кыаллыбатах. Биһилэҕи хаһаайыныгар төнүннэрбиттэр.

РФ Холуобунай Кодексатын 158-с ыстатыйатын 2-с чааһынан «Уоруу» холуобунай дьыала тэрилиннэ. Эдэр уол биэс сылга диэри көҥүлэ быһыллыан сөп.