Дьокуускайга Элбэх өҥөнү оҥорор дьиэ кэргэн киинэ аһылынна

Оҕо көмүскэлин күнүн көрсө Дьокуускайга Элбэх өҥөнү оҥорор дьиэ кэргэн киинин арыйдылар. Бу киин «Берегиня» дьиэ кэргэҥҥэ оҕону иитиигэ көмөлөһөр киин баазатыгар аһылынна.

Үөрүүлээх аһыллыыга бырабыыталыстыба бэрэссэдээтэлин солбуйааччы Георгий Степанов, үлэ, социальнай сайдыы миниистирэ Елена Волкова, Уопсастыбаннай балаата бэрэсээдээтэлэ Станислав Иванов, «Берегиня» дириэктэрэ Анастасия Дьяконова кытыннылар.

Георгий Степанов иһитиннэрбитинэн, Саха сирэ 2022 сыллаахха дойдуга биир бастакынан РФ үлэҕэ, социальнай сайдыыга министиэристибэтин уонна Оҕолору өйүүр пуонда пилотнай бырайыагар киирбитэ. Онон өрөспүүбүлүкэҕэ маннык үһүс киин арылынна.

Биир этээстээх, 431 кв.м. иэннээх дьиэҕэ «Сардаана» кэбиниэт үлэлиэҕэ. Бу кэбиниэт хат дьахталларга, ийэлэргэ социальнай-реабилитационнай, чэбдигирдэр көмөнү оҥоруоҕа. Маны тэҥэ, тренажернай саала, ийэ-оҕо хоһо, туус хоһо, оҕо оонньуур хоһо баар. Барыта аныгылыы хааччыллыылаах. Улаатан эрэр оҕолорго «Перспектива» кулууп, аҕаларга «Папа и я» кулууп үлэлиэхтэрэ.

— Элбэх өҥөнү оҥорор дьиэ кэргэн киинэ көмө саҥа көрүҥүн киллэрэр. Дьиэ кэргэттэргэ «биир түннүк» быһыытынан көмөнү оҥоруоҕа. Онон оҕолоох дьиэ кэргэттэр хаһан баҕарар көмөнү ылыахтара. Манна ыарахан балаһыанньаҕа түбэспит ыаллары кытта эрэ буолбакка, бары дьиэ кэргэттэри кытта үлэлииллэр, — диэн миниистир Елена Волкова эттэ.

Элбэх өҥөнү оҥорор дьиэ кэргэн кииннэрэ Чурапчыга уонна Намҥа номнуо үлэлииллэр. Бу сылга Мииринэйгэ аһыллыаҕа. Дьиэ кэргэн сылыгар бэртээхэй бэлэх буолар.

Ил Дархан, бырабыыталыстыба пресс-сулууспата.