Дьокуускайга элбэх хайысхалаах успуорт саалата аһылынна

Ахсынньы 20 күнүгэр Дьокуускайга «Спортивнай» түөлбэҕэ элбэх хайысхалаах успуорт саалатын үөрүүлээх аһыллыыта буолла. СӨ Ил Дархана Айсен Николаев сиэр-туом кэмигэр, бырайыак Арассыыйа бэрэсидьиэнинэн бигэргэтиллибит куорат сайдыытын маастар-былаанын чэрчитинэн көрүллүбүт федеральнай үбүлээһин көмөтүнэн кыаллыбытын бэлиэтээтэ.

«Саахалланар дьиэлэртэн 90 ыалы көһөрөн баран, кылгас кэм иһигэр Саҥа дьыл иннинэ аһыллар успуорт саалатын тутар кыахтанныбыт», – диэн Айсен Николаев эттэ. Кини «Спортивнай» түөлбэ сайдыыта – социальнай инфраструктураны бастакы миэстэҕэ туруорар, тутууга сөптөөх сыһыан холобура буоларын эбэн эттэ.

«Соторутааҕыта биһиги эһигини кытта манна оҕо уһуйаанын аспыппыт. Бүгүн успуорт саалата тутулунна, сотору оскуола тутуллан саҕаланыа, ону кытта тэҥҥэ олорор дьиэлэр тутуулара саҕаланар», – диэн Ил Дархан быһаарда. Кини этэринэн, 2026 сылга номнуо 17-с кыбаартал сиригэр бастакы дьиэлэр үлэҕэ киириэхтэрэ, оттон саҥа олорор дьиэ уопсай кээмэйэ 300 тыһыынча квадратнай миэтэрэттэн тахсыаҕа. Айсен Николаев саҥа успуорт комплекска кэлэр кэминээҕи аан дойду чөмпүйүөннэрэ уонна олимпиецтэр үүнэн тахсыахтарыгар эрэлин биллэрдэ.

Дьокуускай куорат баһылыга Евгений Григорьев эбийиэк рекорднай кылгас кэм иһигэр – биэс ыйынан тутуллубутун бэлиэтээтэ. «СӨ Ил Дархана Айсен Николаев тус өйөбүлүнэн уонна Дьокуускай маастар-былаана олоххо киириитинэн, куорат сиригэр-уотугар биэс сыл иһигэр номнуо төрдүс  ыччат успуорт оскуолатын аһабыт. Былырыын атырдьах ыйыгар манна өссө 90-тан тахса кыбартыыралаах икки уопсай дьиэ турара», – диэн Евгений Григорьев эттэ.