Дьокуускайга элбэх оҕолоох ыалларга баһаартан сэрэтэр тэриллэри туруораллар

Дьокуускайга баһаартан сэрэтэр тэриллэри (АДПИ) Строительнай уокурук Дзержинскэй уулуссатыгар элбэх оҕолоох ыалларга туруортуу сылдьаллар.

Санатан эттэххэ, маннык тэриллэри бары уокуруктарга уонна куорат тас өттүгэр бэдэрээттээх тэрилтэни кытта дуогабардаһан туруортууллар. Строительнай уокуруг управатын салайар Андрей Петров иһитиннэрбитинэн, АДПИ туруортарарга управаларыгар эбэтэр управлениеҕа биллэриэхтэрин наада.

Дьокуускайга хонтуруоллуур уонна профилактическай үлэ инженерэ Вячеслав Попов кэпсээбитинэн, АДПИ баһаары саҥа саҕаланан, буруолаан эрдэҕинэ биллэрэр. Онон кини маннык тэрили туруортарар наадатын бэлиэтиир.

Дьокуускайга ГОЧС уонна ОБП управлениетын начаалынньыга Николай Егоров бу үлэ Дьокуускай куорат баһылыга Евгений Григорьев сорудаҕынан ыытылларын, сыл бүтүөр диэри 1100 ыалга туруоруллуохтааҕын этэр.

Дьокуускай куорат дьаһалтатын пресс-сулууспата

Хаартыска: Дьокуускай куорат дьаһалтатын саайтыттан